ଭୁବନେଶ୍ୱର: ରାଜ୍ୟରେ ୧୮ରୁ ୪୪ବର୍ଷ ଯୁବବର୍ଗଙ୍କ ପାଇଁ ରାଜ୍ୟ ସରକାରଙ୍କ ପକ୍ଷରୁ ମାଗଣା ଟିକାକରଣ ପାଇଁ ମାସକ ତଳୁ ଆରମ୍ଭ ହୋଇଥିବା ବୈଶ୍ବିକ ଟିକା କିଣା ପ୍ରସ୍ତାବ ଆହ୍ବାନ (ଗ୍ଲୋବାଲ ଟେଣ୍ଡର) ପ୍ରକ୍ରିୟା ଏବେ ଆବଶ୍ୟକତା ପଡିବ ନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୁବବର୍ଗଙ୍କ ଲାଗି ମାଗଣା ଟିକାକରଣ କରାଯିବ ବୋଲି ଘୋଷଣା କରିବା ପରେ ରାଜ୍ୟର ଏହି ଟେଣ୍ଡର ପ୍ରକ୍ରିୟା ଆପଣା ଛାଏଁ ବାତିଲ ହୋଇଯିବ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ଅନ୍ୟପକ୍ଷରେ ଟିକାର ଅଭାବ ବେଳେ ପ୍ରଧାନମନ୍ତ୍ରୀଙ୍କ ଏହି ଘୋଷଣାକୁ ନେଇ ଯୁବବର୍ଗଙ୍କ ମଧ୍ୟରେ ଏକ ପ୍ରକାର ଉତ୍ସାହ ଦେଖାଦେଇଛି।
ସୂଚନା ଅନୁଯାୟୀ ରାଜ୍ୟରେ ଏବେ ୩.୫୦ ଲକ୍ଷରୁ ଊର୍ଦ୍ଧ୍ବ ଟିକା, ଯାହାକି ୪୫ ବର୍ଷରୁ ଊର୍ଦ୍ଧ୍ବ ବର୍ଗର ହିତାଧିକାରୀଙ୍କୁ ଦ୍ୱିତୀୟପାନ ଟିକା ଦେବା ପାଇଁ ଗଚ୍ଛିତ ରହିଥିଲା ତାହା ଉପଯୋଗ ହୋଇପାରିବ। ଯାହା ଫଳରେ ରାଜ୍ୟ ସରକାରଙ୍କ ପକ୍ଷରୁ ୩୨ଟି ସହରାଞ୍ଚଳ ପାଇଁ ଯୋଜନା କରାଯାଇଥିବା ଟିକାକରଣ ପ୍ରକ୍ରିୟା ତ୍ୱରାନ୍ୱିତ ହୋଇପାରିବ।
ଏହି ପରିପ୍ରେକ୍ଷୀରେ ରାଜ୍ୟରେ ଆଜି ସୁଦ୍ଧା ୮୩ ଲକ୍ଷ ୬୨ ହଜାର ୧୦୫ ସଂଖ୍ୟକ ଟିକାକରଣ ହୋଇଛି। ଏଥିରେ ୪୫ ବର୍ଷରୁ ଊର୍ଦ୍ଧ୍ବ ବର୍ଗର ୫୩ ଲକ୍ଷ ୨୦ ହଜାର ୮୮୨ ଜଣ ହିତାଧିକାରୀଙ୍କୁ ପ୍ରଥମ ପାନ ଟିକା ଦିଆଯାଇଥିବାବେଳେ ୧୧ ଲକ୍ଷ ୪ ହଜାର ୮୯୮ଙ୍କୁ ଦ୍ୱିତୀୟ ପାନ ଟିକା ଦିଆଯାଇଛି। ଏହାବାଦ୍ ୩ ଲକ୍ଷ ୩୧ ହଜାର ୨୮୫ ସ୍ୱାସ୍ଥ୍ୟ କର୍ମୀ ପ୍ରଥମ ପାନ ଟିକା ନେଇଥିବା ବେଳେ ୨ ଲକ୍ଷ ୭୯ ହଜାର ୫୩୨ ଜଣ ଦ୍ୱିତୀୟ ପାନ ଟିକା ନେଇଛନ୍ତି। ସେହିପରି ୨ଲକ୍ଷ ୯୪ ହଜାର ୫୧୭ଜଣ କରୋନା ଯୋଦ୍ଧା ପ୍ରଥମ ପାନ ଟିକା ନେଇଥିବା ବେଳେ ୧ ଲକ୍ଷ ୭୩ ହଜାର ୧୮୮ ଜଣ ଦ୍ୱିତୀୟପାନ ଟିକା ନେଇଛନ୍ତି। ଅନ୍ୟପକ୍ଷରେ ୧୮ରୁ ୪୪ବର୍ଷ ଯୁବକଙ୍କ ପାଇଁ ଆରମ୍ଭ ହୋଇଥିବା ଟିକାକରଣ ଅଭିଯାନରେ ଇତିମଧ୍ୟରେ ୮ ଲକ୍ଷ ୪୪ ହଜାର ୪୮ ଜଣ ପ୍ରଥମ ପାନ ଟିକା ନେଇଥିବା ବେଳେ ୧୩ ହଜାର ୭୫୫ ଦ୍ୱିତୀୟପାନ ଟିକା ନେଇଛନ୍ତି।
