ନୂଆଦିଲ୍ଲୀ : ଯଦି ଆପଣ ମଧ୍ୟ ୟୁପିଆଇ ଲାଇଟ୍ ବ୍ୟବହାର କରୁଛନ୍ତି ତେବେ ଏହି ଖବର ଆପଣଙ୍କୁ ଖୁସି କରିଦେବ । ଦିପାବଳୀ ପୂର୍ବରୁ ରିଜର୍ଭ ବ୍ୟାଙ୍କ ୟୁପିଆଇ ଲାଇଟରେ ହେଉଥିବା ନେଣଦେଣର ସୀମା ବଢାଇ ଦେଇଛି । ନୂଆ ନିୟମ ଅନୁସାରେ ରିଜର୍ଭ ବ୍ୟାଙ୍କ ଟ୍ରାଞ୍ଜାକ୍ସନ ସୀମାକୁ ୫୦୦ ଟଙ୍କାରୁ ବଢାଇ ୧୦୦୦ ଟଙ୍କା କରିଦେଇଛି । ଏହା ସହିତ ୟୁପିଆଇ ଲାଇଟ ଓ୍ବାଲେଟ ସୀମାକୁ ମଧ୍ୟ ୨ ହଜାର ଟଙ୍କାରୁ ବଢାଇ ୫ ହଜାର ଟଙ୍କା କରିଦିଆଯାଇଛି । ରିଜର୍ଭ ବ୍ୟାଙ୍କ ୟୁପିଆଇ ୧୨୩ ପେ ପ୍ରତି ନେଣଦେଣ ସୀମାକୁ ୫ ହଜାର ଟଙ୍କାରୁ ବୃଦ୍ଧି କରି ୧୦ ହଜାର ଟଙ୍କା କରିଦେଇଛି ।
ରିଜର୍ଭ ବ୍ୟାଙ୍କ ଗଭର୍ଣ୍ଣର କହିଛନ୍ତି କି ୟୁପିଆଇ ଲଗାତର ନୂଆ ନିୟମ ଜରିଆରେ ଡିଜିଟାଲ ପୈଠକୁ ସହଜ ଓ ସରଳ କରିବାକୁ ଚେଷ୍ଟା କରୁଛି । ଲୋକଙ୍କୁ ଡିଜିଟାଲ ପୈଠ ପ୍ରତି ଆକର୍ଷିତ କରିବା ପାଇଁ ଏମିତି ନିଷ୍ପତ୍ତି ନିଆଯାଇଛି । ଏପର୍ଯ୍ୟନ୍ତ ୟୁପିଆଇ ଲାଇଟ ଓ୍ବାଲେଟରୁ ଥରକରେ ଆପଣ ୫୦୦ ଟଙ୍କା ପର୍ଯ୍ୟନ୍ତ ପଠାଇ ପାରୁଥିଲେ କିମ୍ବା ପ୍ରାପ୍ତ କରୁଥିଲେ । ଏବେ ଏହି ସୀମା ବଢାଇଦିଆଯାଇଛି ।
