ପୁରୀ ସଂସ୍କୃତ ବିଶ୍ୱବିଦ୍ୟାଳୟରେ ବିଭିନ୍ନ ପ୍ରକଳ୍ପର ଶିଳାନ୍ୟାସ କଲେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ

ଡେସ୍କ :  ପୁରୀ ସଦାଶିବ କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟର ନବକଳେବର ପାଇଁ କେନ୍ଦ୍ର ସରକାର ୧୦୦ କୋଟି ଟଙ୍କା ମଞ୍ଜୁର କରିଛନ୍ତି । ଶନିବାର କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏଥିରେ ନିର୍ମାଣ ହେବାକୁ ଥିବା ପ୍ରକଳ୍ପର ଶିଳାନ୍ୟାସ କରିଛନ୍ତି । ଏହି ପ୍ରକଳ୍ପ ଅଧୀନରେ ପୁରୀ ସଦାଶିବ ସଂସ୍କୃତ ବିଶ୍ୱବିଦ୍ୟାଳୟରେ ୮ ମହଲା ବିଶିଷ୍ଟ ପ୍ରଶାସନିକ ଓ ଶୈକ୍ଷିକ ଭବନ ନିର୍ମାଣ ହେବ। ଏଥିସହିତ ମନ୍ତ୍ରୀ ଶ୍ରୀ ପ୍ରଧାନ ୫ ମହଲା ବିଶିଷ୍ଟ ମହିଳା ଓ ପୁରୁଷ ଛାତ୍ରାବାସର ଶିଳାନ୍ୟାସ କରିଛନ୍ତି । ପୁରୀ ତାଳବଣିଆ ଠାରେ ୧୦ ଏକର ପରିମିତ ଜମିରେ ବିଶ୍ୱବିଦ୍ୟାଳୟର ସମସ୍ତ କୋଠା ନିର୍ମାଣ ହେବ । ଏହି ଅବସରରେ ବିଶ୍ୱବିଦ୍ୟାଳୟ​ରେ ଲକ୍ଷ୍ମୀ ପୁରାଣ ସଂପର୍କରେ ଆୟୋଜିତ ତିନି ଦିନିଆ ଅନ୍ତରାଷ୍ଟ୍ରୀୟ ସମ୍ମିଳନୀରେ ସେ ଯୋଗ ଦେଇଥିଲେ।

ଶ୍ରୀ ପ୍ରଧାନ କହିଥିଲେ  ଭାରତ ସଂସ୍କୃତ, ତାମିଲ ଭଳି ପ୍ରାଚୀନ ଭାଷାର  ଏବଂ ଅନେକ ସମୃଦ୍ଧ ଭାଷାର ଦେଶ । ସାଂପ୍ରତିକ ସମୟରେ ଚିରସ୍ଥାୟୀ ଭାରତୀୟ ଜ୍ଞାନ ପରମ୍ପରା ଏବଂ ବୈଦିକ ସାହିତ୍ୟର ପ୍ରାସଙ୍ଗିକତା ଆହୁରି ଅଧିକ। ଲକ୍ଷ୍ମୀ ପୁରାଣ ଓ ବେଦର ଜ୍ଞାନ, ମୂଲ୍ୟବୋଧ ଓ ବାର୍ତ୍ତାକୁ ଗ୍ରହଣ କରି ଆମେ ସାମାଜିକ ନ୍ୟାୟ, ମହିଳା ସଶକ୍ତୀକରଣ ଓ ମହିଳାଙ୍କ ନେତୃତ୍ବାଧୀନ ବିକାଶ ଦିଗରେ ଅଗ୍ରସର ହୋଇପାରିବା । ମୋର ବିଶ୍ୱାସ ଯେ କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟ ସଂସ୍କୃତ ସମେତ ଭାରତୀୟ ଭାଷା, ସାହିତ୍ୟ ଏବଂ ଐତିହ୍ୟ ସହିତ ନୂତନ ପିଢ଼ିକୁ ଯୋଡ଼ିବା ପାଇଁ କାର୍ଯ୍ୟ କରିବ।

Inauguration of 3-day International Seminar on Lakshmi Purana at Central Sanskrit University, Puri. https://t.co/BmvoUZN8Wi

— Dharmendra Pradhan (@dpradhanbjp) November 18, 2023

କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଶନିବାର ପୁରୀ ଗସ୍ତରେ ଯାଇ ଶ୍ରୀମନ୍ଦିରରେ ମହାପ୍ରଭୁଙ୍କୁ ଦର୍ଶନ କରିଥିଲେ । ଏହି ଅବସରରେ ଶ୍ରୀମନ୍ଦିର ରତ୍ନଭଣ୍ଡାର ଖୁବ୍‌‌ଶୀଘ୍ର ଖୋଲାଯିବା ସମ୍ପର୍କରେ ମତ ରଖି ସେ କହିଥିଲେ, ଜଗନ୍ନାଥ ସଂସ୍କୃତି କେବଳ ଧାର୍ମିକ ଶ୍ରଦ୍ଧାର ପ୍ରତୀକ ନୁହେଁ; ଏହା ଏକ ସାମାଜିକ ସଂସ୍କାର ଓ ପ୍ରଗତିଶୀଳ ସଂସ୍କୃତିର ମହାକାବ୍ୟ। ସନାତନୀ ଭାବାବେଗକୁ ସରକାର ଧ୍ୟାନ ଦେବାର ଆବଶ୍ୟକତା ଅଛି । ପରିକ୍ରମା ପ୍ରକଳ୍ପ ସହ ମରାମତିକୁ ମଧ୍ୟ ଗୁରୁତ୍ୱ ଦିଆଯିବ ଜରୁରୀ ବୋଲି ସେ ମତ ରଖିଥିଲେ। ଏଥିସହିତ ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା(ଏଏସ୍‌‌ଆଇ) ଦ୍ୱାରା ଚାଲିଥିବା ନାଟମଣ୍ଡପ ମରାମତି କାର୍ଯ୍ୟର ଅନୁଧ୍ୟାନ କରିଥିଲେ।