ୟୁକ୍ରେନରୁ ସୈନ୍ୟ ପ୍ରତ୍ୟାହାର ପାଇଁ ରୁଷକୁ ଅନୁରୋଧ

ନ୍ୟୁୟର୍କ : ରୁଷ୍‌-ୟୁକ୍ରେନ ଯୁଦ୍ଧକୁ ଏକବର୍ଷ ପୂରଣ ହୋଇଥିବାବେଳେ, ୟୁକ୍ରେନରେ ଶାନ୍ତି ପ୍ରତିଷ୍ଠା ସମ୍ପର୍କୀତ ଏକ ପ୍ରସ୍ତାବ ମିଳିତ ଜାତିସଂଘର ସାଧାରଣ ପରିଷଦ ବୈଠକରେ ଗୃହୀତ ହୋଇଛି। ୟୁକ୍ରେନରୁ ନିଜର ସୈନ୍ୟ ପ୍ରତ୍ୟାହାର କରିବା ସହ ଆକ୍ରମଣରୁ ବିରତ ରହିବାକୁ ଏହି ପ୍ରସ୍ତାବ ମାଧ୍ୟମରେ ରୁଷକୁ ଅନୁରୋଧ କରାଯାଇଛି। ଏହି ପ୍ରସ୍ତାବ ସପକ୍ଷରେ ୧୪୧ ସଦସ୍ୟ ଭୋଟ ଦେଇଥିବା ବେଳେ ୭ ଜଣ ଏହାର ବିରୋଧ କରିଛନ୍ତି। ତେବେ ଭାରତ ସମେତ ୩୨ଟି ଦେଶ ଭୋଟଦାନରୁ ବିରତ ରହିଥିଲେ।
ୟୁକ୍ରେନର ସାର୍ବଭୌମତ୍ୱ ତଥା ଅଖଣ୍ଡତା ବଜାୟ ରଖିବା ସହ ଏହି ପ୍ରସ୍ତାବକୁ ସମର୍ଥନ କରିବା ଲାଗି ୭୫ରୁ ଅଧିକ ଦେଶର ବୈଦେଶିକ ମନ୍ତ୍ରୀ ଓ ପ୍ରତିନିଧିମାନେ ଦୁଇଦିନ ଧରି ଆଲୋଚନା କରିଥିଲେ। ଏଥିରେ ଉଦବେଧନ ଦେଇ ମିଳିତ ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ରୁଚିରା କ୍ୟାମ୍ବୋଜ୍ କହିଛନ୍ତି, ୟୁକ୍ରେନରେ ସୃଷ୍ଟି ହୋଇଥିବା ପ୍ରତିସ୍ଥିତି ଲାଗି ଭାରତ ନିଜର ଉଦବେଗ ପ୍ରକାଶ କରିଛି । ଏହି ସଂଘର୍ଷ ଯୋଗୁଁ ଅଗଣିତ ନାଗରୀକ ନିଜର ବାସସ୍ଥାନ ହରାଇବା ସହ ସର୍ବହରା ହୋଇଛନ୍ତି। ତେବେ ୟୁକ୍ରେନ୍ ବିବାଦକୁ ଭାରତ ବର୍ତ୍ତମାନ ସୁଦ୍ଧା ମାନବିକତା ଦୃଷ୍ଟିରେ ଦେଖିଆସିଛି ଏବଂ ଭବିଷ୍ୟତରେ ମଧ୍ୟ ଏହା ଜାରି ରଖିବ। ଏହାର ଅଂଶସ୍ୱରୂପ ଭାରତ ପକ୍ଷରୁ ୟୁକ୍ରେନକୁ ମାନବୀୟ ସହାୟତା ଯୋଗାଇ ଦିଆଯାଉଛି ବୋଲି ଶ୍ରୀମତୀ କ୍ୟାମ୍ବୋଜ୍ କହିଛନ୍ତି।

Excerpts from PR @ruchirakamboj’s explanation of vote at the #UNGA Emergency Special Session on #Ukraine today. pic.twitter.com/tUptpHj09j

— India at UN, NY (@IndiaUNNewYork) February 24, 2023