ଜି.ଉଦୟଗିରି : ହିଂସ୍ର ଦନ୍ତାହାତୀକୁ ସ୍ଥାନାନ୍ତର ଓ ଅଞ୍ଚଳବାସୀଙ୍କ ଧନଜୀବନ ସୁରକ୍ଷା ଦାବିରେ କନ୍ଧମାଳ ଜିଲ୍ଲା ଜି.ଉଦୟଗିରି ଓ କଳିଙ୍ଗାଠାରେ ଅଞ୍ଚଳବାସୀଙ୍କ ପକ୍ଷରୁ ମଙ୍ଗଳବାର ଦିନ ୧୨ ଘଣ୍ଟିଆ ବନ୍ଦ ଡାକରା ଦିଆଯାଇଥିଲା । ପୂର୍ବରୁ ଦନ୍ତା ହାତୀ ଉପଦ୍ରବ ବାବଦରେ ବାରମ୍ବାର ବନବିଭାଗ ଓ ପ୍ରଶାସନକୁ ଜଣାଇଥିଲେ ସୁଦ୍ଧା ଏଯାବତ୍ ସୁରକ୍ଷା ନପାଇ ଭୟଭୀତ ଅବସ୍ଥାରେ ଜୀବନ ବିତାଉଛନ୍ତି ଅଞ୍ଚଳବାସୀ । ଶେଷରେ ଅତିଷ୍ଠ ହୋଇ ଆଜି ୧୨ ଘଣ୍ଟିଆ ବନ୍ଦ ଡାକରା ଦେଇଛନ୍ତି ଜି.ଉଦୟଗିରି ଓ କଳିଙ୍ଗା ଅଞ୍ଚଳବାସୀ । ଅଞ୍ଚଳବାସୀ ବନ୍ଦ ଡାକରା ଦେବା ଫଳରେ ବ୍ରହ୍ମପୁର, ଭୁବନେଶ୍ୱର, ଫୁଲବାଣୀ ମଧ୍ୟରେ ଯାନବାହାନ ଚଳାଚଳ ଠପ୍ ହୋଇପଡ଼ିଥିବା ଦେଖିବାକୁ ମିଳିଛି । ଗୋଠ ଛଡ଼ା ଦନ୍ତା ହାତୀ ଆକ୍ରମଣରେ କଳିଙ୍ଗା ପଞ୍ଚାୟତର ମାଲାନାସୁଗା ଗ୍ରାମର ସାମନ୍ତ ଦିଗାଳ ଓ ଆଡାସିକୁପା ଗ୍ରାମ ପାଙ୍ଗାନାଜୁର ପ୍ରଶାନ୍ତ ନାୟକ ଦୁଇଜଣଙ୍କ ମୃତ୍ୟୁ ଘଟିଥିବା ବେଳେ ୮ ରୁ ଉର୍ଦ୍ଧ୍ୱ ଗାଈଗୋରୁଙ୍କ ମଧ୍ୟ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ସେପଟେ ହାତୀ ଘଉଡ଼ାଇବାକୁ ନାକେଦମ ହୋଇ ସାରିଲାଣି ବନ ବିଭାଗ ।ଏନେଇ ଆଜି ମଧ୍ୟାହ୍ନରେ ଏକ ରାଲି ହାଟପଦାଠାରୁ ବାହାରି ମାନ୍ୟବର ରାଜ୍ୟପାଳଙ୍କ ଉଦେଶ୍ୟରେ ତହସିଲଦାର ରଞ୍ଜନ କୁମାର ସାହୁ ଓ ମାନ୍ୟବର ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ବିଡିଓ ଶରତ ଚନ୍ଦ୍ର ମଲିକଙ୍କୁ ୪ ଦଫା ସମ୍ବଳିତ ଦାବି ପତ୍ର ପ୍ରଦାନ କରିଥିଲେ । ଖବର ପାଇ ଫୁଲବାଣୀ ବନଖଣ୍ଡ ଅଧିକାରୀ ପ୍ରତାପ କଟାପାଲି ଜି ଉଦୟଗିରି ବନାଞ୍ଚଳରେ ଉପସ୍ଥିତ ରହି ଘଟଣାର ସମୀକ୍ଷା କରୁଥିବା ଜଣାପଡିଛି।
Popular Categories
Previous article
Next article