ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ କାଶ୍ମୀର ପ୍ରସଙ୍ଗରେ ମୁଣ୍ଡ ପୂରାଇଛନ୍ତି। ଭାରତ ଏବଂ ପାକିସ୍ତାନ ମଧ୍ୟରେ ଚାଲିଥିବା ଏହି ବିବାଦର ସମାଧାନ ଲାଗି ଟ୍ରମ୍ପ ମଧ୍ୟସ୍ଥତା କରିବା ପାଇଁ ଆଗ୍ରହୀ ଥିବା କହିଛନ୍ତି। ଦିନକ ପୂର୍ବରୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ସହ ଫୋନରେ କଥା ହୋଇଥିଲେ। ସପ୍ତାହ ଶେଷ ଆଡକୁ ସେ ମୋଦୀଙ୍କ ନିକଟରେ ଏହି ପ୍ରସଙ୍ଗ ଉଠାଇବେ ବୋଲି କହିଥିଲେ। ଏବେ ଖବରଦାତାଙ୍କୁ ଟ୍ରମ୍ପ କହିଛନ୍ତି, କାଶ୍ମୀର ଏକ ଜଟିଳ ସ୍ଥାନ। ଏଠାରେ ହିନ୍ଦୁ ଏବଂ ମୁସଲମାନ ବି ଅଛନ୍ତି। ତେଣୁ ମଧ୍ୟସ୍ଥତା ପାଇଁ ଯାହା ବି ସବୁଠାରୁ ଭଲ ହେବ ତାହା ମୁଁ କରିବି। ଉଭୟ ଦେଶ ମଧ୍ୟରେ ଶାନ୍ତି ଫେରାଇ ଆଣିବା ଲାଗି ଉଦ୍ୟମ କରିବି।
ତେବେ ଟ୍ରମ୍ପ ଇମ୍ରାନଙ୍କ ସହ କଥା ହେବା ସମୟରେ କହିଥିଲେ ଯେ, କାଶ୍ମୀର ପ୍ରସଙ୍ଗରେ ଭାରତ ବିରୋଧରେ କଟୁ ମନ୍ତବ୍ୟ ଦେବାରୁ ଦୂରେଇ ରୁହ। ପରିସ୍ଥିତିକୁ ଜଟିଳ ଦର୍ଶାଇ ସେ ଦୁଇ ପକ୍ଷଙ୍କୁ ସଂଯମତା ରକ୍ଷା କରିବାକୁ ପରାମର୍ଶ ଦେଇଥିଲେ।
