ସମାଜ ଡିଜିଟାଲ ଡେସ୍କ: ତିହାର ଜେଲରେ ଅଓ୍ବାମୀ ଇତେହାଦ ପାର୍ଟି ସାଂସଦ ଇଞ୍ଜନିୟର ରସିଦଙ୍କୁ କିନ୍ନରମାନେ ମାଡ଼ ମାରିଥିବା ଅଭିଯୋଗ ହୋଇଛି। ରସିଦଙ୍କ ଆଡଭୋକେଟ ଜାଭେଦ ହୁବ୍ବୀ ଏହି ସୂଚନା ଦେଇଛନ୍ତି। ରସିଦ ତିହାର ଜେଲରେ ବନ୍ଦୀ ଜୀବନ କାଟୁଛନ୍ତି। କିଛି ଦିନ ତଳେ ଜେଲର କିଛି କିନ୍ନରଙ୍କ ସହିତ ରସିଦଙ୍କର ପାଟିତୁଣ୍ଡ ହୋଇଥିଲା। ଏହି ସମୟରେ କିନ୍ନରମାନେ ତାଙ୍କୁ ମାଡ଼ ମାରିଥିଲେ ବୋଲି ଜାଭେଦ କହିଛନ୍ତି।
ଜାଭେଦ ଆହୁରି କହିଛନ୍ତି ଯେ, ରସିଦଙ୍କ ସୂଚନା ଅନୁସାରେ ତିହାର ଜେଲରେ ଅଧିକାରୀମାନେ କାଶ୍ମୀରୀ କଏଦୀମାନଙ୍କୁ ହଇରାଣ ହରକତ କରିବା ଲାଗି ନୂଆ ନୂଆ ତରିକା ଆପଣାଉଛନ୍ତି। ଜାଣି ଶୁଣି ବାରାକଗୁଡ଼ିକରେ ପୁରୁଷ କିନ୍ନରମାନଙ୍କୁ ରଖାଯାଉଛି। ସେମାନଙ୍କୁ କାଶ୍ମୀରୀ କଏଦୀମାନଙ୍କୁ ଉସୁକାଇବା, ଆକ୍ରମଣ କରିବା ଏବଂ ଶତ୍ରୁତାପୂର୍ଣ୍ଣ ପରିବେଶ ସୃଷ୍ଯି କରିବାକୁ ପ୍ରୋତ୍ସାହିତ କରାଯାଉଛି।
