ଟିଟିଲାଗଡ଼: କରୋନା ମହାମାରି ସମୟରେ ଲୋକେ କର୍ମସଂସ୍ଥାନ ହରାଇ ଭୋକିଲା ହୋଇ ପଡିଛନ୍ତି। ଏମିତିରେ ଗୋସମ୍ପଦଙ୍କ କଥା ପଚାରେ କିଏ। ବିଶେଷ କରି ସହରାଞ୍ଚଳରେ ବୁଲା ଗାଈଗୋରୁ ଏଣେତେଣେ ମୁହଁ ମାରୁଥିବା ଦେଖାଯାଇଛି। ଟିଟିଲାଗଡ ପୌରାଞ୍ଚଳରେ ପୌର ପରିଷଦ ପକ୍ଷରୁ ବୁଲା ଗାଈଗୋରୁଙ୍କ ପାଇଁ କୌଣସି ଆନ୍ତରିକତା ନଥିବା ପରିଲକ୍ଷିତ ହୋଇଛି। ଗାଈଗୋରୁ ସହରରେ ଏଣେ ତେଣେ ପଡିଥିବା ଆବର୍ଜନା ଗଦାରେ ଖାଦ୍ୟ ଖୋଜୁଛନ୍ତି।
ଏପରିକି ପଲିଥିନ ମଧ୍ୟ ଖାଇ ଅନେକ ଗାଈଗୋରୁଙ୍କ ପେଟ ହାଣ୍ଡି ଭଳି ଫୁଲୁଥିବା ଅଭିଯୋଗ ହୋଇଛି। ବୁଲା ଗାଈଗୋରୁ ଚାରା ଟିକିଏ ପାଇଁ ହାହାକାର ହେଉଥିବା ବେଳେ ରାଜ୍ୟ ସରକାର ସ୍ୱତନ୍ତ୍ର ପାଣ୍ଠି ଘୋଷଣା କରିଛନ୍ତି। ତେବେ ଟିଟିଲାଗଡ ପୌରାଞ୍ଚଳରେ ପାଣ୍ଠି କିଭଳି ବ୍ୟୟ ହେଉଛି ତାହା ସାଧାରଣ ଜନତା ଟେର ପାଉନଥିବା ଅଭିଯୋଗ ହୋଇଛି। ଏନେଇ ପୌର ପ୍ରଶାସନ ବୁଲା ଗାଈଗୋରୁଙ୍କ ପାଇଁ ତୁରନ୍ତ ଖାଦ୍ୟ ପ୍ରଦାନ ବ୍ୟବସ୍ଥା କରିବାକୁ ଦାବି ହୋଇଛି।
