ଟିଟିଲାଗଡ଼: ଟିଟିଲାଗଡ଼ ସହର ସିରଭଟା ସ୍ଥିତ ରେଳବାଇ କର୍ମଚାରୀ ଦିଲୀପ କୁମାରଙ୍କ ଏକମାତ୍ର ୧୩ ବର୍ଷର ପୁଅଙ୍କ ଆଜି ମୃତଦେହ ଜବତ କରିଛି ଟିଟିଲାଗଡ଼ ପୁଲିସ । ଗତ ଶନିବାର ଦିନ ଘରୁ ଝାଙ୍କର ପଡାକୁ ଟ୍ୟୁସନ ପାଇଁ ଆସିଥିବା ବେଳେ ଆଉ ଘରକୁ ଫେରିନଥିଲେ ନାବାଳକ । ଘର ଲୋକେ ବହୁ ଖୋଜା ଖୋଜି କରିବା ପରେ ମୋହନର ପତ୍ତା ନପାଇବା ପରେ ଟିଟିଲାଗଡ଼ ଥାନାରେ ଏକ ଅଭିଯୋଗ କରିଥିଲେ ।
ସେପଟେ ପାଖରେ ଲାଗିଥିବା ଏକ ସିସିଟିଭି ଫୁଟେଜରେ ଜଣେ ଛାତ୍ର ସାଇକଲ ଯୋଗେ ଯାଉଥିବାର ଦେଖା ଯାଉଛି । ତେବେ ମୋହନ ଚାଲି ଚାଲି ଟ୍ୟୁସନ ଆସୁଥିବା ବେଳେ ସାଇକେଲ ଧରି ଯାଉଥିବା ଅନୁମାନ କରାଯାଇଥିଲା । ହେଲେ କୁଆଡେ ଯାଇଛି ତାହା ଜଣା ପଡ଼ିନଥିଲା । ଏନେଇ ଟିଟିଲାଗଡ଼ ପୁଲିସ ନିଖୋଜ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ବେଳେ ତାକୁ ଅପହରଣ କରିଥିବା ଏବଂ ୧୪ ଲକ୍ଷ ଟଙ୍କା ଦେଲେ ପୁଅକୁ ଛାଡ଼ିବା ନେଇ ମୋହନ ଧରିଥିବା ମୋବାଇଲ ଫୋନରୁ ବାର୍ତ୍ତା ଆସିଥିଲା । ପୁଲିସ ଆଜି ଅପହରଣ ଏବଂ ହତ୍ୟା ଅଭିଯୋଗରେ କେସିଙ୍ଗା ସହରରୁ ମୃତ ନାବାଳକର ସମ୍ପର୍କୀୟ ସୁମିତ ବିହାରୀ ନାମକ ଜଣେ ବ୍ୟକ୍ତିଙ୍କୁ ଗିରଫ କରିବା ସହ ମୃତଦେହ ଜବତ କରିଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି ।
Comments are closed.