ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ମଧୁମେହ ରୋଗ ଏବଂ ଇନସୁଲିନକୁ ନେଇ ଆମ ଆଦମୀ ପାର୍ଟି(ଆପ୍) ଏବଂ ବିଜେପି ମଧ୍ୟରେ ଆରୋପ ପ୍ରତ୍ୟାରୋପ ଜାରି ରହିଛି। ଏହା ମଧ୍ୟରେ ନିଜେ କେଜ୍ରିୱାଲ ମୁହଁ ଖୋଲିଛନ୍ତି। ସେ ତିହାର ଜେଲ୍ ଅଧୀକ୍ଷକଙ୍କୁ ଏକ ଚିଠି ଲେଖି ତାଙ୍କ ସମ୍ପର୍କରେ ଜେଲ ପ୍ରଶାସନ ଦେଉଥିବା ମନ୍ତବ୍ୟ ମିଥ୍ୟା ବୋଲି ଅଭିଯୋଗ କରିଛନ୍ତି। ସେ ପ୍ରତିଦିନ ଇନ୍ସୁଲିନ ମାଗୁଛନ୍ତି, କିନ୍ତୁ ତାଙ୍କୁ ଦିଆଯାଉ ନାହିଁ ବୋଲି କେଜ୍ରିୱାଲ କହିଛନ୍ତି।
କେଜ୍ରିୱାଲ କହିଛନ୍ତି ଯେ, ସେ ଖବରକାଗଜରୁ ତିହାର ଜେଲ ପ୍ରଶାସନର ମନ୍ତବ୍ୟ ପଢ଼ିବା ପରେ ଅତ୍ୟନ୍ତ ଦୁଃଖ ଅନୁଭବ କରୁଛନ୍ତି। ଜେଲ ପ୍ରଶାସନର ୨ଟି ଯାକ ମନ୍ତବ୍ୟ ମିଥ୍ୟା। ସେ ଜେଲ୍ ପ୍ରଶାସନକୁ ଗ୍ଲୁକୋ ମିଟର ରିଡିଂ ଦେଖାଇବା ସହିତ ଦିନକୁ ୩ ଥର ସୁଗାର ସ୍ତର ବୃଦ୍ଧି ପାଉଥିବା ଜଣାଇଛନ୍ତି। ତାଙ୍କ ରକ୍ତରେ ସୁଗାର ସ୍ତର ୨୫୦ରୁ ୩୨୦ ମଧ୍ୟରେ ରହୁଛି। କିନ୍ତୁ ମୁଁ ଇନ୍ସୁଲିନ ମାଗି ନ ଥିବା ନେଇ ଜେଲ ପ୍ରଶାସନ ମିଥ୍ୟା କହିଛି। ସେହିପରି ଏମ୍ସ ଡାକ୍ତରମାନେ ମୋ ସ୍ବାସ୍ଥ୍ୟ ପ୍ରତି ଚିନ୍ତିତ ହେବାର କୌଣସି ଆବଶ୍ୟକତା ନାହିଁ ବୋଲି କଦାପି କହିନାହାନ୍ତି। ଏ ସମ୍ପର୍କରେ ବି ଜେଲ ପ୍ରଶାସନ ମିଛ କହିଛି। ରାଜନୈତିକ ଚାପରେ ପ୍ରଶାସନ ଏପରି କରୁଥିବା ସେ ଅଭିଯୋଗ କରିଛନ୍ତି।
