ତିଗିରିଆ : ତିଗିରିଆ ଅଞ୍ଚଳରେ ହାତୀ ଆକ୍ରମଣରେ ଜଣେ ବୃଦ୍ଧଙ୍କର ମୃତ୍ୟୁ ହୋଇଛି । ସୂଚନା ମୁତାବକ ତିଗିରିଆ ଥାନା ଭୋଗଡ। ପଞ୍ଚାୟତ ଅନ୍ତର୍ଗତ ଗୋକର୍ଣଖାଲ ଗ୍ରାମର କରୁଣାକର ରାଉତ ( ୭୨) ଶନିବାର ଭୋର ସମୟରେ ଆମ୍ବ ତୋଟାକୁ ଆମ୍ବ ଗୋଟାଇବା ପାଇଁ ଯାଉଥିବା ବେଳେ ହାତୀ ହାବୁଡରେ ପଡି ଯାଇଥିଲେ । ହାତୀ ତାଙ୍କୁ ଆକ୍ରମଣ କରି ପାଦରେ ଦଳି ଦେବାରୁ ଘଟଣା ସ୍ଥଳରେ ସେ ମୃତ୍ୟୁବରଣ କରିଛନ୍ତି । ଏହି ଖବର ପାଇବା ପରେ ତିଗିରିଆ ଥାନା ପୁଲିସ, ବନ କର୍ମଚାରୀ ଏବଂ ଆଠଗଡ ବନାଞ୍ଚଳ ଅଧିକାରୀ ରବୀନ୍ଦ୍ର କୁମାର ନାୟକ ଘଟଣା ସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି । ଉଲ୍ଲେଖ ଯୋଗ୍ୟ, ଗତ କିଛି ଦିନ ହେଲା ତିଗିରିଆ ଅଞ୍ଚଳର ବିଭିନ୍ନ ସଂରକ୍ଷିତ ଜଙ୍ଗଲର ନିକଟବର୍ତ୍ତୀ ଗ୍ରାମ ଏବଂ ରାସ୍ତାରେ ହାତୀ ପଲଙ୍କ ଉପଦ୍ରବ ଦେଖିବାକୁ ମିଳିଛି । ମୃତ୍ୟୁ ହୋଇଥିବା ବୃଦ୍ଧଙ୍କୁ ହାତୀ ରାସ୍ତା ଉପରେ ଦଳି ମାରିଥିବା ଜଣାପଡ଼ିଛି ।
Comments are closed.