ହରଭଙ୍ଗା: ରାଜ୍ୟରେ ଦିନକୁ ଦିନ ବାଘ ସଂଖ୍ୟା ହ୍ରାସ ପାଉଛି। ଶିମିଳିପାଳ, ସାତକୋଶିଆ ଭଳି ଅଭୟାରଣ୍ୟଗୁଡ଼ିକରେ ମହାବଳ ସଂଖ୍ୟା କାଁ ଭାଁ ରହିଥିବା କୁହାଯାଉଛି। ମାତ୍ର ବୌଦ୍ଧ-କିଆକଟା ରାସ୍ତାରେ ମଙ୍ଗଳବାର ବିଳମ୍ବିତ ରାତିରେ ୫ଟି ମହାବଳ ବାଘ ଗୋଟିଏ ପରେ ଗୋଟିଏ ରାସ୍ତା ଅତିକ୍ରମ କରୁଥିବା ଦେଖିବାକୁ ମିଳିଛି। ଏହି ଭିଡିଓକୁ ଦେଖିଲା ପରେ ଜଙ୍ଗଲରେ ବାଘ ଉପସ୍ଥିତି ସ୍ପଷ୍ଟ ହୋଇଛି।
ସୂଚନା ମତେ, ଗତକାଲି ବିଳମ୍ବିତ ରାତିରେ ହରଭଙ୍ଗା ବ୍ଲକ ପୁରୁଣାକଟକ ବଜାରର ଯୁବ ବ୍ୟବସାୟୀ ସଜ୍ଜନ କୁମାର ଅଗ୍ରଓ୍ବାଲା ସମ୍ବଲପୁରରୁ ରେଢାଖୋଲ ଦେଇ ପୁରୁଣାକଟକ କାର୍ ଯୋଗେ ଫେରୁଥିଲେ। କିଆକଟା ପାଖାପାଖି ହେଲା ବେଳକୁ ରାତି ପ୍ରାୟ ୧୨ଟାରୁ ଊର୍ଦ୍ଧ୍ବ ହେବ କିଆକଟା-ବୌଦ୍ଧ ରାସ୍ତାରେ ଗୋଟିଏ ମହାବଳ ବାଘ ରାସ୍ତା ଅତିକ୍ରମ କରୁଥିବା ୨ଶହ ମିଟର ଦୂରରୁ ଦେଖିବାକୁ ପାଇଥିଲେ। ଏହାପରେ ଗାଡ଼ିକୁ ଅଟକାଇ ନିଜ ମୋବାଇଲରେ ଭିଡିଓ କରିଥିଲେ। ଗୋଟିଏ ପରେ ଗୋଟିଏ ଏପରିକି ୫ଟି ବାଘ ନିଜ ଛୁଆ ସହିତ ରାସ୍ତା ଅତିକ୍ରମ କରୁଥିବା ଦେଖି ଭୟଭୀତ ହୋଇଯାଇଥିଲେ। ବାଘ ଚଳପ୍ରଚଳ ଭିଡିଓ ଦେଖିବାପରେ ରାତିରେ ବୌଦ୍ଧ-କିଆକଟା ରାସ୍ତାରେ ଗଲାବେଳେ ପଥଚାରୀ ସାବଧାନର ସହିତ ଯିବାଆସିବା କରିବା ଆବଶ୍ୟକ ବୋଲି ଅଞ୍ଚଳବାସୀଙ୍କୁ ସାବଧାନ କରାଇଛନ୍ତି ସଜ୍ଜନ।
Comments are closed.