ବନହରପାଲି: ଜଣେ ଅସୁସ୍ଥ ଶ୍ରମିକଙ୍କୁ ଡାକ୍ତରଖାନା ନେଉଥିବା ସାଥୀମାନେ ନିଜକୁ ନିଜେ ଡାକ୍ତର ଭାବିନେଲେ। ଡାକ୍ତରଖାନା ନେବା ବାଟରେ ଜୀବନ ଚାଲିଯାଇଥିବା ଭାବି ପୋଲ ତଳକୁ ଫିଙ୍ଗି ଦେଇ ଚାଲିଗଲେ। ଏଭଳି ଏକ ଅଭାବନୀୟ ଘଟଣା ଘଟିଛି ଝାରସୁଗୁଗୁଡା ଜିଲାରେ।
ପୁଲିସ ସୂଚନା ଅନୁଯାୟୀ, ବନହରପାଲି ସ୍ଥିତ ଓପିଜିସିର ନିର୍ମାଣାଧୀନ ୟୁନିଟରେ ଏକ ଠିକା ସଂସ୍ଥାରେ କାର୍ୟ୍ୟରତ ଗୌତମ ଭଣ୍ଡାରେ ନାମକ ଜଣେ ଶ୍ରମିକ ହଠାତ ବିଳମ୍ବିତ ରାତିରେ ଅସୁସ୍ଥ ହୋଇପଡ଼ିଲେ। ତାଙ୍କୁ ସହକର୍ମୀମାନେ ଏକ ବୋଲେରୋରେ ବୁର୍ଲା ଡାକ୍ତରଖାନାକୁ ନେଉଥିଲେ। ରଂପେଲା ବ୍ରିଜ ନିକଟରେ ଗୌତମଙ୍କ ସ୍ବାସ୍ଥ୍ୟାବସ୍ଥା ଆହୁରି ବିଗିଡ଼ି ଗଲା। ତାଙ୍କର ନିଃଶ୍ବାସ ପ୍ରଶ୍ଵାସ ବନ୍ଦ ହୋଇଯାଇଥିବା ଅନୁମାନ କରିବା ପରେ ସାଥୀମାନେ ତାଙ୍କୁ ମୃତ ଭାବିଥିଲେ। ତେଣୁ ଆଉ ଡାକ୍ତରଖାନା ନ ନେଇ ଇବ ନଦୀରେ ନବ ନିର୍ମିତ ବ୍ରିଜ ଉପରୁ ଗୌତମଙ୍କୁ ଫିଙ୍ଗି ଚାଲି ଆସିଥିଲେ । ଖବର ପ୍ରଚାର ହେବା ପରେ ବନହରପାଲି ପୁଲିସ ବୋଲରୋ ଡ୍ରାଇଭର ସହିତ ୪ ଜଣଙ୍କୁ ଅଟକରଖି ପଚରା ଉଚୁରା କରୁଛି। ସେମାନେ ଦୋଷ ସ୍ବୀକାର କରିଥିବା ବନହରପାଲି ପୁଲିସ ଅଧିକାରୀ ପୁରୁଷୋତ୍ତମ ଭୋଇ ସୂଚନା ଦେଇଛନ୍ତି।
