କେନ୍ଦୁଝରଗଡ : କେନ୍ଦୁଝର ସଦର ବନ ବିଭାଗ ପକ୍ଷରୁ ଶୁକ୍ରବାର ବିଳମ୍ବିତ ରାତିରେ ୪୯ନମ୍ବର ଜାତୀୟ ରାଜପଥ ଉପରେ ଚଢ଼ଉ କରାଯାଇ ଏକ ଚୋରା କାଠ ବୋଝେଇ ବୋଲେରୋ ଗାଡିକୁ ଜବତ କରାଯାଇଥିବା ବେଳେ କୌଶଳକ୍ରମେ କାଠ ମାଫିଆ ଓ ବୋଲେରୋ ଚାଳକ ଖସି ପଳାଇବାକୁ ସକ୍ଷମ ହୋଇଛନ୍ତି । ଝୁମ୍ପୁରା ପଟୁ କେନ୍ଦୁଝର ଅଭିମୁଖେ ଏକ ଚୋରା କାଠ ବୋଝେଇ ବୋଲେରୋ ଆସୁଥିବା ନେଇ ସଦର ବନାଞ୍ଚଳ ଅଧିକାରୀ ବିଜୟ କୁମାର ମହାନ୍ତଙ୍କ ନିକଟରେ ବିଶେଷସୂତ୍ରରୁ ଖବର ପହଞ୍ଚିବା ପରେ ବନାଞ୍ଚଳ ଅଧିକାରୀ ଶ୍ରୀ ମହାନ୍ତ କେନ୍ଦୁଝର ଟାଉନ ଫରେଷ୍ଟର ପ୍ରଦୀପ କୁମାର ବାରିକ, ପଳାଶପଙ୍ଗା ଫରେଷ୍ଟର ଜୟକୃଷ୍ଣ ଦାସ, ବୁଲୁ ନାହାକ, ବନରକ୍ଷୀ ସୁବ୍ରତ ପାତ୍ରଙ୍କୁ ନେଇ ରାତି ପ୍ରାୟ ଗୋଟାଏରେ ଚଢ଼ଉ କରିଥିଲେ । ପଦ୍ମପୁର ନିକଟରେ ଉକ୍ତ କାଠ ବୋଝେଇ ବୋଲେରୋକୁ ପିଛା କରିବା ଜାଣିପାରି କାଠ ମାଫିଆ ଦୃତ ଗତିରେ ଗାଡିକୁ ଚଳାଇ ବନ ବିଭାଗ ଗାଡିକୁ ଧକ୍କା ଦେଇ ରାଇସୁଆଁ ମୁସ୍ଲିମ ବସ୍ତିରେ ପଶି କାଠ ବୋଝେଇ ବୋଲେରୋକୁ ଛାଡି ଫେରାର ହୋଇ ଯାଇଥିଲେ । ବନ ବିଭାଗ କର୍ମଚାରୀ କାଠ ବୋଝେଇ ବୋଲେରୋକୁ ଜବତ କରିଥିବା ବେଳେ ମୋଟ ୪୭ ସିଏଫ୍ଟିର ଲକ୍ଷାଧିକ ଟଙ୍କା ମୂଲ୍ୟର ମୂଲ୍ୟବାନ ଶାଳ କାଠ ଜବତ କରିଥିବା ସଦର ବନାଞ୍ଚଳ ଅଧିକାରୀ ଶ୍ରୀ ମହାନ୍ତ କହିଛନ୍ତି।
Comments are closed.