ଟିଟିଲାଗଡ଼: ଟିଟିଲାଗଡ ଡାକ୍ତରଖାନାରେ ଜଣେ ଶିଶୁ ମୃତ୍ୟୁକୁ ନେଇ ଉତ୍ତେଜନା ପ୍ରକାଶ ପାଇଛି। ଡାକ୍ତରଙ୍କ ଅବହେଳା ଯୋଗୁ ଶିଶୁଟିର ମୃତ୍ୟୁ ଘଟିଥିବା ଅଭିଯୋଗ କରି ଅଭିଭାବକ ଏବଂ ସ୍ଥାନୀୟ ଲୋକଙ୍କ ପକ୍ଷରୁ ଡାକ୍ତରଖାନା ସମ୍ମୁଖରେ ମୃତଦେହ ରଖି ରାସ୍ତାରୋକୋ କରାଯାଇଛି।
ସୂଚନା ଅନୁସାରେ, ଲେବଦା ଗ୍ରାମର ରୋହିତ ବାରିକ ନାମକ ବ୍ୟକ୍ତି ନିଜ ୧୪ ମାସର ଶିଶୁକୁ ଜ୍ଵର ହେଉଥିବାରୁ ମଙ୍ଗଳବାର ଅପରାହ୍ନରେ ଟିଟିଲାଗଡ଼ ଉପଖଣ୍ଡ ମୁଖ୍ୟ ଡାକ୍ତରଖାନାକୁ ଆଣିଥିଲେ। ତାଙ୍କୁ ଚିକିତ୍ସା ବଦଳରେ ଏକ ଘରୋଇ ଡାକ୍ତରଖାନାକୁ ଯିବାକୁ ପରାମର୍ଶ ଦିଆଯାଇଥିଲା ବୋଲି ରୋହିତ ଅଭିଯୋଗ କରିଛନ୍ତି। ଏପରି କି ଘରୋଇ ଡାକ୍ତରଖାନାକୁ ଯିବା ପୂର୍ବରୁ ସେଠାରେ ଏକ ଇଞ୍ଜେକ୍ସନ ଦିଆଯାଇଥିଲା। ଏହା ପରେ ରୋହିତ ଶିଶୁ ନେଇ ଘରୋଇ ଡାକ୍ତରଖାନାକୁ ଯାଇଥିଲେ। କିନ୍ତୁ ଡାକ୍ତରଖାନାରେ ପହଞ୍ଚିବା ପୂର୍ବରୁ ପିଲାଟିର ମୃତ୍ୟୁ ଘଟିଥିବା ସେ ଅଭିଯୋଗ କରିଛନ୍ତି।
ଘଟଣା ପ୍ରତିବାଦରେ ଶିଶୁଟିର ପରିବାର ସମେତ ସ୍ଥାନୀୟ ଲୋକେ ଡାକ୍ତରଖାନା ସମ୍ମୁଖରେ ଶିଶୁର ମୃତହେଦ ରଖି ରାସ୍ତା ଅବରୋଧ କରିଛନ୍ତି।
