ରାଉରକେଲା : ସୁନ୍ଦରଗଡ଼ ଜିଲା ତଥା ରାଉରକେଲା ସହରରେ କରୋନା ସଂକ୍ରମଣର ପ୍ରଭାବ ଦିନକୁ ଦିନ ବଢ଼ିବାରେ ଲାଗିଛି l ଏହି ସମୟରେ ସରକାର ତଥା ସ୍ଥାନୀୟ ପ୍ରଶାସନ ତରଫରୁ ସଂକ୍ରମଣକୁ ପ୍ରତିହତ କରିବା ନିମନ୍ତେ କୋଭିଡ କଟକଣା ଜାରି କରାଯାଇଛି। ଯାହା ଫଳରେ ଡାକ୍ତରଖାନାକୁ ସ୍ୱାସ୍ଥ୍ୟ ସେବା ନିମନ୍ତେ ଯିବା ସମସ୍ତ ରୋଗୀଙ୍କ ପାଇଁ ସମ୍ଭବପର ହୋଇପାରୁନାହିଁ l ତେଣୁ ଏହି ସମୟରେ ସ୍ୱାସ୍ଥ୍ୟ ସେବାକୁ ଲୋକାଭିମୁଖୀ କରିବା ତଥା ଜନସାଧାରଣଙ୍କୁ ସହଜ ଓ ସୁବିଧାରେ ସ୍ୱାସ୍ଥ୍ୟ ସେବା ଉପଲବ୍ଧ କରାଇବା ପାଇଁ ରାଜ୍ୟ ସରକାର ସମସ୍ତ ଜିଲା ମୁଖ୍ୟ ଚିକିତ୍ସାଳୟ ସହିତ ରାଉରକେଲା ସରକାରୀ ଚିକିତ୍ସାଳୟରେ ମଧ୍ୟ ଏହି ଟେଲିମେଡିସିନ ସେବା ଆରମ୍ଭ କରିଛନ୍ତି l
ଆରଜିଏଚ ନିର୍ଦେଶକ ଡ଼. ନୀଳକଣ୍ଠ ମିଶ୍ର, ଏହାର ଶୁଭାରମ୍ଭ କରିବା ସହ ରୋଗୀ ତଥା ଜନସାଧାରଣଙ୍କୁ ଏହି ସେବାର ସୁଯୋଗ ନେବାକୁ ଅନୁରୋଧ କରିଛନ୍ତି l ଜନସାଧାରଣ କିମ୍ବା ରୋଗୀ ନିଜ ଘରୁ ଟେଲିମେଡିସିନ ସେବା ପାଇଁ ମୋବାଇଲ ନଂ ୭୬୫୫୦୫୧୩୯୫/ ୭୬୫୫୦୫୧୩୯୬କୁ ଫୋନ କରି ନିଜ ରୋଗର ବିବରଣୀ କହିଲେ ସେମାନଙ୍କୁ ଔଷଧ ତଥା ରୋଗସମ୍ୱନ୍ଧିୟ ପରାମର୍ଶ ଯୋଗାଇଦିଆଯିବ l ଏହି ସେବା ସୋମବାର ଠାରୁ ଶନିବାର ପର୍ଯ୍ୟନ୍ତ ସକାଳ ୮ ଘଟିକା ଠାରୁ ସନ୍ଧ୍ୟା ୫ ଘଟିକା ପର୍ଯ୍ୟନ୍ତ ଏବଂ ରବିବାର ସକାଳ ୮ ଘଟିକା ଠାରୁ ଦିବା ୧ ଘଟିକା ପର୍ଯ୍ୟନ୍ତ ଖୋଲା ରହିବ l ଜନସାଧାରଣ ଅଯଥାରେଘରୁ ନ ବାହାରି ଏହି ସେବାର ସୁବିଧା ନେଇ ପାରିବେ ବୋଲି ବିଭାଗ ତରଫରୁ ଅନୁରୋଧ କରାଯାଇଛି l
