ନୀଳଗିରି : ବାଲେଶ୍ଵର ଓ ମୟୂରଭଞ୍ଜ ଜିଲାକୁ ସଂଯୋଗ କରୁଥିବା ନୀଳଗିରି-କପ୍ତିପଦା ରାସ୍ତାର ଟାଙ୍ଗଣା ଛକ ନିକଟ ପୋଲଟି ସୋମବାର ରାତି ସାଢ଼େ ୧୦ଟା ସମୟରେ ଅତଡ଼ା ଖସି ବିପଦସଙ୍କୁଳ ଅବସ୍ଥାରେ ରହିଛି । ଅବିଶ୍ରାନ୍ତ ବର୍ଷା ଯୋଗୁ ପ୍ରାୟ ୪୦ ଫୁଟ ବିଶିଷ୍ଟ ଏହି ପୋଲ ଉପରେ ୩/୪ଟି ସ୍ଥାନରେ ଘାଇ ସୃଷ୍ଟି ହୋଇଛି । ଆଖି ପିଛୁଳାକେ ଅତଡ଼ା ଖସି ଚାଲିଥିଲେ ହେଁ ଏହି ରାସ୍ତାରେ ଭାରୀଯାନ ଚଳାଚଳ ବନ୍ଦ ହେଉନଥିବା ଅଭିଯୋଗ ହୋଇଛି । ପୂର୍ତ୍ତ ବିଭାଗ ପକ୍ଷରୁ କୌଣସି ଅଧିକାରୀ କିମ୍ବା ପୁଲିସ ପ୍ରଶାସନ ପହଞ୍ଚିନାହିଁ । କଟକ-ଭୁବନେଶ୍ବରକୁ ଯାଉଥିବା ଯାତ୍ରାବାହୀ ବସଗୁଡ଼ିକ ଏହି ଦୁର୍ବଳ ପୋଲ ଉପରେ ଚଢ଼ି ପାରି ହେଉଥିବା ଅଞ୍ଚଳବାସୀ ଅଭିଯୋଗ କରୁଛନ୍ତି । କେଉଁ ମୁହୂର୍ତ୍ତରେ କିଛି ବି ବିପଦ ଘଟିପାରେ ବୋଲି କୁହାଯାଉଛି । ସେପଟେ ଅଞ୍ଚଳବାସୀଙ୍କ ତରଫରୁ ସେହି ରାସ୍ତାକୁ ସିଲ୍ କରିବାକୁ ଉଦ୍ୟମ କରାଯାଉଥିବା ବେଳେ ଭାରୀଯାନଗୁଡ଼ିକ ସେମାନଙ୍କ କଥାକୁ ଭ୍ରୁକ୍ଷେପ ନକରି ଯାତାୟାତ କରୁଛନ୍ତି । ଜରୁରୀକାଳୀନ ପରିସ୍ଥିତିରେ ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି । ଅପରପକ୍ଷରେ ରାଜ୍ୟ ରାଜପଥ ନିର୍ମାଣ ଚାଲୁଥିବା ଏବଂ ଏହି ଦୁର୍ବଳ ପୋଲ ପାର୍ଶ୍ଵରେ ଅନ୍ୟ ଏକ ନୂତନ ପୋଲ ଦୀର୍ଘଦିନ ହେବ ଅଧାପନ୍ତରିଆ ହୋଇ ପଡ଼ି ରହିଥିବା ଜଣାପଡ଼ିଛି ।
Comments are closed.