ଏବେ ଦେଶରେ ଟମାଟୋ ଦର ୧୪ ଟଙ୍କାକୁ ଖସିଲା – କିଛି ଦିନ ମଧ୍ୟରେ ଦର ୯୫ ପ୍ରତିଶତ ହ୍ରାସ

ନୂଆଦିଲ୍ଲୀ – ଗତ କିଛି ସପ୍ତାହ ତଳେ ଟମାଟୋ କିଲୋପ୍ରତି ୨୦୦ ଟଙ୍କା ପହଞ୍ଚିଥିଲା। ଅନେକ ରେଷ୍ଟୁରାଣ୍ଟ ମେନୁରୁ ବି ଟମାଟୋକୁ ବାଦ ଦିଆଯାଇଥିଲା । ଏବେ ଟମାଟୋ ଦର ୧୪ ଟଙ୍କାରେ ପହଞ୍ଚିଛି । ମାତ୍ର କିଛି ଦିନ ମଧ୍ୟରେ ଦର ୯୫ ପ୍ରତିଶତ ହ୍ରାସ ପାଇଛି ।

ଟମାଟୋ ଦର ପ୍ରାୟ ୪୦୦ ପ୍ରତିଶତ ବୃଦ୍ଧି ପାଇଥିଲା । ଏବେ କେତକ ସ୍ଥାନରେ ୨୦ ଟଙ୍କା ଏବଂ ଅଧିକ ଉତ୍ପାଦନ ହେଉଥିବା ରାଜ୍ୟମାନଙ୍କରେ ୧୪ ଟଙ୍କାରେ ଏକ କିଲୋ ଟମାଟୋ ମିଳୁଛି । ସାରା ଭାରତରେ ଏବେ ଟମାଟୋ କିଲୋପ୍ରତି ୧୦ରୁ ୩୦ ଟଙ୍କା ମଧ୍ୟରେ ରହିଛି ।

କେନ୍ଦ୍ର ସରକାରଙ୍କ ଇ-ନାମ୍‌ ପୋର୍ଟାଲ ଅନୁସାରେ ଅଗଷ୍ଟ ୨୭ ତାରିଖରେ ଆନ୍ଧ୍ରପ୍ରଦେଶର ମନ୍ଦାନାପଲ୍ଲୀ ମଣ୍ଡିରେ ଟମାଟୋ କିଲୋପ୍ରତି ୧୪ ଟଙ୍କା ଥିଲା । ଉତ୍ତରପ୍ରଦେଶରେ ୨୮ ଟଙ୍କା , ରାଜସ୍ଥାନରେ ୨୫ ଟଙ୍କା, ଓଡ଼ିଶାରେ ୨୦ରୁ ୪୦ ଟଙ୍କା ହିମାଚଳପ୍ରଦେଶରେ ୧୩ରୁ ୪୦ ଟଙ୍କା ପ୍ରତିକିଲୋ ଟମାଟୋ ମିଳୁଥିବା ଏଥିରେ ଉଲ୍ଲେଖ କରାଯାଇଛି ।

ଏବେ ଅଧିକ ଟମାଟୋ ଉତ୍ପାଦନ ହେଉଥିବାରୁ ଟମାଟୋ ଦର ହ୍ରାସ ପାଇଥିବା ଜଣା ପଡିଛି ।