ଭୁବନେଶ୍ବର: ୬ଜଣ ଅଗ୍ନିଶମ କର୍ମଚାରୀ ନିଲମ୍ବିତ ହୋଇଛନ୍ତି। କର୍ତ୍ତବ୍ୟରେ ଅବହେଳା, ବିଶୃଙ୍ଖଳିତ ଆଚରଣ ପାଇଁ ସେମାନଙ୍କୁ ନିଲମ୍ବନ କରାଯାଇଛି। ନିଲମ୍ବିତ କର୍ମଚାରୀଙ୍କ ମଧ୍ୟରେ ମୟୂରଭଞ୍ଜ ଚିତ୍ରଡା ଫାୟାର ଷ୍ଟେସନର ୨କର୍ମଚାରୀ, ଦଶପଲ୍ଲାର ୨ ଏବଂ ବାଲିଆପାଳର ୨କର୍ମଚାରୀ ଥିବା ସୂଚନା ମିଳିଛି।
ସୂଚନାଯୋଗ୍ୟ ଯେ, ସୋମବାର ଠାରୁ ଅଗ୍ନିଶମ ବିଭାଗର କର୍ମଚାରୀମାନେ ବିଭିନ୍ନ ଦାବି ନେଇ ଆନ୍ଦୋଳନ କରିଛନ୍ତି। ଆନ୍ଦୋଳନ ଯୋଗୁଁ ସେମାନେ ଆପତକାଳୀନ ସ୍ଥିତିରେ ସହାୟତା କରୁନାହାନ୍ତି। ନୟାଗଡ଼ରେ ଭୟାବହ ଅଗ୍ନିକାଣ୍ଡ ଘଟି ୮ ବଖରା ପୋଡ଼ି ଯାଇଥିଲା। ସେହିପରି ମୟୂରଭଞ୍ଜରେ ଏକ ଶିଶୁର ପାଣିରେ ବୁଡ଼ି ମୃତ୍ୟୁ ଘଟିଥିଲା। ବାଲିଆପାଳରେ ଏକ କୁକୁଡା ଦୋକାନରେ ନିଆଁ ଲାଗି ଶତାଧିକ କୁକୁଡା ମରି ଯାଇଥିଲେ। ଏହି ତିନୋଟି ଯାକ ଘଟଣାରେ ଅନୁରୋଧ ସତ୍ତ୍ବେ ଅଗ୍ନିଶମ କର୍ମଚାରୀମାନେ ଉଦ୍ଧାର ପାଇଁ ଯାଇନଥିଲେ। ଏଭଳି ଏକାଧିକ ଘଟଣା ଘଟିଥିଲେ ମଧ୍ୟ ସେମାନେ କର୍ତ୍ତବ୍ୟ ପ୍ରତି ଉଦାସୀନ ଥିବାରୁ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
