ନୂଆଦିଲ୍ଲୀ: ବିଭିନ୍ନ ରେଳ ସମ୍ବନ୍ଧୀୟ ସେବାକୁ ଶୃଙ୍ଖଳିତ କରିବା ଉଦ୍ଦେଶ୍ୟରେ ଭାରତ ସରକାର ଏକ ସୁପର ଆପ୍ ଉପରେ କାମ କରୁଛନ୍ତି ବୋଲି କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି। ଏହାର ବୈଶିଷ୍ଟ୍ୟ ଉପରେ ନିର୍ଦିଷ୍ଟ ବିବରଣୀ ପ୍ରଦାନ କରି ନ ଥିଲେ ମଧ୍ୟ ଏହି ସୁପର୍ ଆପ୍ ସହାୟତାରେ ରେଳ ଟିକଟ କରିବା, ପିଏନ୍ଆର ସ୍ଥିତି ଯାଞ୍ଚ, ରେଳ କେଉଁ ଷ୍ଟେସନରେ ଅଛି ତାହାର ସୂଚନା ଭଳି ବହୁ ଗୁରୁତ୍ବପୂର୍ଣ୍ଣ ସୂଚନା ମିଳିପାରିବ। ଏହି ଅବସରରେ ସେ ଏନ୍ଡିଏ ସରକାରଙ୍କ ଅମଳରେ ଗତ ଦଶନ୍ଧି ମଧ୍ୟରେ ରେଳ ବିଭାଗରେ ହୋଇଥିବା ଗୁରୁତ୍ବପୂର୍ଣ୍ଣ ଅଗ୍ରଗତି ଉପରେ କହିଛନ୍ତି। ବର୍ତ୍ତମାନ ରେଳ ଟିକଟ କରିବା, ପିଏନ୍ଆରର ସ୍ଥିତି ଯାଞ୍ଚ, ରେଳର ଅବସ୍ଥିତି, କୋଚ୍ ଅବସ୍ଥିତି ଯାଞ୍ଚ ଆଦି ବିଭିନ୍ନ ସେବା ପାଇଁ ବିଭିନ୍ନ ଆପ୍ ରହିଛି। ତେଣୁ ଯାତ୍ରୀଙ୍କ ସୁବିଧା ନିମନ୍ତେ ରେଳଯାତ୍ରା ପାଇଁ ଯେଉଁସବୁ ସେବା ଆବଶ୍ୟକ ତାହା ଏହି ଗୋଟିଏ ସୁପର୍ ଆପ୍ରେ ଉପଲବ୍ଧ ହେବ। ଶ୍ରୀ ବୈଷ୍ଣବ କହିଛନ୍ତି ଯେ, ଗତବର୍ଷ ଦେଶରେ ୫ ହଜାର ୩ଶହ ରେଳପଥ ନିର୍ମାଣ କରାଯାଇଛି, ଯାହା ସ୍ବିଜରଲାଣ୍ଡର ମୋଟ ରେଳ ନେଟ୍ୱର୍କ ସହ ସମାନ। ସୁରକ୍ଷିତ ଯାତ୍ରା ଉପରେ ସେ କହିଛନ୍ତି ଯେ, ୧୦ ବର୍ଷ ପୂର୍ବେ ବାର୍ଷିକ ପ୍ରାୟ ୧୭୧ ରେଳ ଦୁର୍ଘଟଣା ଘଟୁଥିବାବେଳେ ବର୍ତ୍ତମାନ ତାହା ବାର୍ଷିକ ୪୦କୁ ହ୍ରାସ ପାଇଛି। ମଧ୍ୟବିତ୍ତ ବର୍ଗର ରେଳ ଯାତ୍ରୀଙ୍କୁ ଉନ୍ନତ ଓ ସୁଲଭ ରେଳ ସୁବିଧା ଯୋଗାଇବା ପାଇଁ ଅମ୍ରିତ୍ ଭାରତ ରେଳ ଚଳାଚଳ କରାଯାଇଛି। ଯେଉଁଥିରେ ହଜାରେ କିଲୋମିଟର ଯାତ୍ରା ପାଇଁ ମାତ୍ର ୪ଶହରୁ ୪୫୦ ଟଙ୍କା ଟିକଟ ମୂଲ୍ୟ ପଡ଼ୁଛି। ସେହିଭଳି ଭାରତର ବନ୍ଦେ ଭାରତ ରେଳ ପାଇଁ ଆନ୍ତର୍ଜାତିକ ସ୍ତରରେ ଚାହିଦା ବଢ଼ୁଥିବାବେଳେ ଚିଲି ଭଳି କେତେକ ଦେଶ ବନ୍ଦେ ଭାରତ ରେଳ କିଣିବା ପାଇଁ ଇଚ୍ଛାପ୍ରକାଶ କରିଛନ୍ତି।
Comments are closed.