ସୁଆଣ୍ଡୋ: ପୁରୀ ଜିଲା ସତ୍ୟବାଦୀବ୍ଲକ ଅନ୍ତର୍ଗତ ବଳପୁର ଗ୍ରାମର ଶ୍ରୀ ବାଲୁଙ୍କେଶ୍ୱର ମହାଦେବ ଦଶହରା ଉପଲକ୍ଷେ ଭାର୍ଗବୀନଦୀରେ ଚାପ ଖେଳିଲେ। ଏହି ନିଆରା ପରମ୍ପରା ଏଠାରେ ଶହ ଶହ ବର୍ଷ ଧରି ରହି ଆସିଛି। ଶ୍ରୀ ବାଲୁଙ୍କେଶ୍ୱର ମହାଦେବଙ୍କ ସହିତ କୁଶୁମେଶ୍ୱର ଉଗ୍ରତାରା ଆନନ୍ଦପୁର ଓ ପଣ୍ଡାସାହିର ତାରିଣୀଙ୍କ ସହିତ ଦିହୁଡି ସାହିର ଷଷ୍ଠିଦେବୀ ଅପରାହ୍ନରେ ସୁସଜ୍ଜିତ ବିମାନରେ ବିଜେ କରି ଗ୍ରାମ ପରିକ୍ରମା କରିଥିଲେ। ଗ୍ରାମରେ ଠାକୁରଙ୍କୁ ଚୁଡାଘଷା ଖଇକୋରା ଲଡୁ ଆଦି ମିଷ୍ଟାନ୍ନ ଫଳମୂଳ ଛେନା ପଇଡ ପଣା ଦୁଆରିଭୋଗ ଲାଗି କରାଯାଇଥିଲା।
ଭାର୍ଗବୀନଦୀରେ ସୁସଜ୍ଜିତ ଦୁଇଟି ଡଙ୍ଗାରେ ଠାକୁର ବିଜେ କରି ଚାପ ଖେଳିଥିଲେ। ନଦୀରେ ଅଢେଇ କୋଶ ଚାପ ଖେଳି ସାରିବା ପରେ ଠାକୁରାଣୀ ମାନଙ୍କୁ ନିଜ ଗ୍ରାମମୁଣ୍ଡ ତୁଠରେ ମେଲାଣି ଦେଇ ବାଲୁଙ୍କେଶ୍ଵର ମହାଦେବ ମନ୍ଦିରକୁ ବିଜେ କରିଥିଲେ। ଟ୍ରଷ୍ଟବୋର୍ଡ଼ ଓ ଗ୍ରାମଦେଶ କୋଠ ପକ୍ଷରୁ କୋଭିଡ ନିୟମ ମାନି ନିରାଡମ୍ବର ଭାବେ ଠାକୁରଙ୍କ ଯାତ୍ରା ଅନୁଷ୍ଠିତ ହୋଇଥିଲା।ସେହିପରି ବିଭୁତି ବାଟିକାରୁ ବରାଳୟଙ୍କ ବିଭୁତି ପାଇଁ ସେବାୟତ ମାନେ ଠାକୁରଙ୍କ ଆଜ୍ଞାମାଳ ଆଣି ମୃତ୍ତିକା ସଂଗ୍ରହ କରିଥିଲେ।
