ଗୋପାଳପୁର : ବୁଧବାର ଦିନ ଗୋଳନ୍ଥରା ଥାନା ଅର୍ନ୍ତଗତ ହରଡ଼ଙ୍ଗ ଗ୍ରାମର ସିଦ୍ଧଭୈରବୀ ହାଇସ୍କୁଲର ୩ ଦଶମ ଶ୍ରେଣୀ ଛାତ୍ର ବାଇକରେ ପରୀକ୍ଷା ଦେବା ପାଇଁ ଗୋଳନ୍ଥରା ଯିବା ସମୟରେ ବାଇକ୍ ଦୁର୍ଘଟଣା ଘଟି ୩ ଜଣ ଗୁରୁତର ହୋଇ ମେଡିକାଲରେ ଚିକିତ୍ସିତ ହେଉଥିବା ବେଳେ ଆଜି ଜଣଙ୍କର ମୃତ୍ୟୁ ଘଟିଥିବା ସୂଚନା ମିଳିଛି । ମୃତ୍ୟୁବରଣ କରିଥିବା ଛାତ୍ର ଜଣଙ୍କ ହରଡ଼ଙ୍ଗ ଗାଁର ଜି. ଡିଲେଶ୍ୱର ରେଡ୍ଡୀ ବୋଲି ଜଣା ପଡିଛି । ସୂଚନା ଅନୁଯାୟୀ ଗତକାଲି ସକାଳ ୭ଟା ବେଳେ ହରଡଙ୍ଗ ଗ୍ରାମର ବି. ଅନିଲ ପାତ୍ର, ସିଏଚ. ଦିଲୀପ ପାତ୍ର, ଜି. ଦିଲେଶ୍ୱର ରେଡ୍ଡୀ ବାଇକରେ ଦଶମ ଶ୍ରେଣୀ ପରୀକ୍ଷା ଦେବାପାଇଁ ଗୋଳନ୍ଥରା ସ୍ଥିତ ବିଶ୍ଵନାଥ ଉଚ୍ଚ ବୈଷୟିକ ବିଦ୍ୟାଳୟକୁ ଯାଉଥିବାବେଳେ ପାଲୁର ନିକଟରେ ଭାରସାମ୍ୟ ହରାଇ ଏକ ଗଛକୁ ପିଟିଦେଇଥିଲେ। ଦୁର୍ଘଟଣାରେ ତିନି ଜଣ ଗୁରୁତର ଆହତ ହୋଇଥିଲେ। ସମସ୍ତଙ୍କୁ ଉଦ୍ଧାର କରି ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଡିଲେଶ୍ୱରଙ୍କ ସ୍ୱାସ୍ଥ୍ୟ ଅବସ୍ଥା ସଙ୍କଟାପନ୍ନ ହେବାରୁ ଉତ୍ତମ ଚିକିତ୍ସା ପାଇଁ ବିଶାଖପାଟଣା ସ୍ଥାନାନ୍ତର କରାଯାଇଥିଲା । ଆଜି ଚିକିତ୍ସାଧିନ ଅବସ୍ଥାରେ ତାଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଏ ନେଇ ଗୋଳନ୍ଥରା ଥାନା କେସ୍ ନଂ ୯୩/୨୪ରେ ଏକ ମାମଲା ରୁଜୁ ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି ।
Comments are closed.