କଟକ : କଟକ-ତ୍ରିଶୂଳିଆ ପୋଲ ନିକଟରେ ଆଲବମ୍ ସୁଟିଂ ଦେଖିବାକୁ ଯାଇ ବିଡ଼ାନାସୀ ଗୋପାଳସାହିର ଶଙ୍କର ସାହୁଙ୍କ ପୁଅ କାହ୍ନୁ ସାହୁ (କାହ୍ନା) ନିଖୋଜ ହେବା ଘଟଣା ଇତିମଧ୍ୟରେ ତିନିଦିନ ବିତିଯାଇଛି। ପରିବାର,ପୁଲିସ, ଅଗ୍ନିଶମ ଓ ଓଡ୍ରାଫ ଦଳ ପ୍ରମୁଖ କାହ୍ନୁର ସନ୍ଧାନ ନେଇ ଚାଲିଥିଲେ ମଧ୍ୟ କୌଣସି ସନ୍ଧାନ ପାଇପାରି ନାହାନ୍ତି। ପୋଲ ଉପରୁ କେବଳ କାହ୍ନାର ସାଇକଲକୁ ଜବତ କରିଛି।
ଆଜି ଏହି ଘଟଣାରେ ପୁଲିସ ତା’ ସାଙ୍ଗରେ ସୁଟିଂ ଦେଖିବାକୁ ଯାଇଥିବା ସାଙ୍ଗକୁ ପଚରା ଉଚୁରା କରିଥିଲା; କିନ୍ତୁ ସୁଟିଂ ଚାଲିଥିବାରୁ କିଛି ସମୟ ପରେ ଫେରିବ ବୋଲି କହି ତାକୁ ଘରକୁ ଯିବାପାଇଁ କହିବାରୁ ସେ ସେଠାରୁ ଚାଲି ଆସିଥିଲା ବୋଲି କହିଛି। ଅନ୍ୟପକ୍ଷରେ ୮ଦିନ ତଳେ କାହ୍ନୁ ଓ ତା’ର ଜଣେ ସାଙ୍ଗଙ୍କ ସହିତ ଟଙ୍କା ଉଧାରକୁ ନେଇ ପାଟିତୁଣ୍ଡ ହୋଇଥିଲା। ସେହିଦିନ ଘରକୁ ଫେରିବା ପରେ କାହ୍ନୁ ଘଟଣା ସଂପର୍କରେ କହିବା ସହିତ ଆଉ ତା’ ସହିତ ସାଙ୍ଗ ହେବନାହିଁ ଜଣାଇ ଥିଲା ବୋଲି ବାପା ଶଙ୍କର ସୂଚନା ଦେଇଛନ୍ତି। ପୁଅ ରାଜାବଗିଚା ସିଟି ମହାବିଦ୍ୟାଳୟରେ ଯୁକ୍ତଦୁଇ ଦ୍ୱିତୀୟ ବାର୍ଷିକ ଛାତ୍ର ଥିବା ବେଳେ ସ୍ୱଭାବରେ ସେ ଅତି ସରଳ ଓ ମେଳାପୀ ଥିଲା। ନିଶ୍ଚିତ ଭାବେ ସେ ଘରକୁ ଫେରିଆସିବ ବୋଲି ଶଙ୍କର ଆଶା ରଖିଛନ୍ତି।
