ଗୋଟିଏ ଦିନରେ ଦୁଇଟି ସ୍ଥାନରେ ବନ୍ଦ ପାଳନ
କଟକ: ଶନିବାର ଦିନ ରାଜ୍ୟର ଦୁଇଟି ସ୍ଥାନରେ ବନ୍ଦ ପାଳନ କରାଯାଇଛି । ଗୋଟିଏ ପଟେ ମୟୁରଭଞ୍ଜରେ ୧୨ଘଣ୍ଟିଆ ବନ୍ଦ ଡାକରା ଦିଆଯାଇ ଥିବା ବେଳେ ଅନ୍ୟପଟେ କଟକ ଜିଲା ସାଲେପୁରରେ ଦିନିକିଆ ବନ୍ଦ ପାଳନ କରାଯାଇଛି ।
ସ୍ଥାୟୀ ହାଇକୋର୍ଟ ବେଞ୍ଚ ପ୍ରତିଷ୍ଠା ଦାବିରେ ଓକିଲ ସଂଘ ଏବଂ ଝାଡଖଣ୍ଡ ମୁକ୍ତି ମୋର୍ଚ୍ଚା ପକ୍ଷରୁ ଶନିବାର ମୟୁରଭଞ୍ଜରେ ୧୨ଘଣ୍ଟିଆ ବନ୍ଦ ଡାକରା ଦିଆଯାଇଥିଲା। ଏହା ସହ ବାରିପଦା ଅର୍ବାନ ବ୍ୟାଙ୍କକୁ ପୁନଃ କାର୍ୟ୍ୟକ୍ରମ, ଲୋକଙ୍କ ଜମା ଟଙ୍କା ଫେରସ୍ତ ଏବଂ ଜିଲାକୁ ରେଳ ବିଭାଗର ଅବହେଳା ପରି ବିଭିନ୍ନ ଦାବି ନେଇ ବନ୍ଦ ଡାକରା ଦିଆଯାଇଥିଲା। ଜିଲାରେ ବିଭିନ୍ନ ସ୍ଥାନରେ ବନ୍ଦର ପ୍ରଭାବ ଦେଖିବାକୁ ମିଳିଥିଲା। ଦୋକାନ ବଜାର, ଶିକ୍ଷାନୁଷ୍ଠାନ ବନ୍ଦ ରହିଥିବା ବେଳେ ଜାତୀୟ ରାଜପଥରେ ଯାତାୟତ ଠପ୍ ହୋଇଯାଇଥିଲା।
ସେହିପରି କଟକ-ଚାନ୍ଦବାଲି ରାସ୍ତାର ନବୀକରଣ ଦାବିରେ ସାଲେପୁରରେ ଶନିବାର ଦିନ ଦିନିକିଆ ବନ୍ଦ ଡାକରା ଦିଆଯାଇଥିଲା। ରାସ୍ତା ନବୀକରଣ ସହ ଡ୍ରେନେଜ ବ୍ୟବସ୍ଥା ଏହିପରି ୭ ଦଫା ଦାବି ନେଇ ସ୍ଥାନୀୟ ବିଭିନ୍ନ ସାମାଜିକ ସଂଗଠନ ପକ୍ଷରୁ ବନ୍ଦ ପାଳନ କରାଯାଇଥିଲା। ସେମାନଙ୍କ ଅଭିଯୋଗ ଥିଲା ଯେ, ଏନେଇ ବାରମ୍ବାର ପ୍ରଶାସନ ନିକଟରେ ଦାବି କରାଯାଉଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠ ଗ୍ରହଣ କରାଯାଉନାହିଁ । ବିଭିନ୍ନ ସ୍କୁଲ, କଲେଜ ସହ ଅନ୍ୟାନ୍ୟ ସରକାରୀ ଓ ବେସରକାରୀ ଅନୁଷ୍ଠାନ ବନ୍ଦକୁ ସମର୍ଥନ ଜଣାଇଛନ୍ତି । ଆନ୍ଦୋଳକାରୀମାନେ ମୁଖ୍ୟରାସ୍ତା ଉପରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି । ସୁରକ୍ଷାକୁ ଦୃଷ୍ଟିରେ ରଖି ସହରର ପୁଲିସ ଫୋର୍ସ ମୁତୟନ କରାଯାଇଛି ।