ସିଡ୍ନୀ : ଅଷ୍ଟ୍ରେଲିଆ କ୍ରିକେଟ ଦଳର ପୂର୍ବତନ ଅଧିନାୟକ ଷ୍ଟିଭେନ ସ୍ମିଥ୍ ଶନିବାର ତାଙ୍କର ଦୀର୍ଘଦିନର ବାନ୍ଧବୀ ଡାନି ୱିଲିସଙ୍କୁ ବିବାହ କରିଛନ୍ତି। ୨୦୧୧ରେ ଅଷ୍ଟ୍ରେଲିଆରେ ବିଗ୍ ବାସ୍ ଟ୍ୱେଣ୍ଟି୨୦ କ୍ରିକେଟ ଟୁର୍ଣ୍ଣାମେଣ୍ଟର ପ୍ରଥମ ସଂସ୍କରଣ ଚାଲିଥିବାବେଳେ ସ୍ମିଥ୍ ଓ ଡାନି ପରସ୍ପରକୁ ଭେଟିଥିଲେ। ପରବର୍ତ୍ତୀ ସମୟରେ ଉଭୟଙ୍କ ମଧ୍ୟରେ ପ୍ରେମସମ୍ପର୍କ ଗଢିଉଠିଥିଲା। ୨୯ ବର୍ଷୀୟ ସ୍ମିଥ୍ ୨୦୧୭ରେ ଡାନିଙ୍କୁ ବିବାହ ପ୍ରସ୍ତାବ ଦେଇଥିଲେ। ଚଳିତବର୍ଷ ମାର୍ଚ୍ଚରେ କେପ୍ଟାଉନଠାରେ ଘରୋଇ ଦକ୍ଷିଣ ଆଫ୍ରିକା ବିପକ୍ଷରେ ଟେଷ୍ଟ ମ୍ୟାଚ ଖେଳୁଥିବାବେଳେ ଅଷ୍ଟ୍ରେଲିଆର ଓପନିଂ ବ୍ୟାଟସମ୍ୟାନ କାମେରୁନ ବାନ୍କ୍ରଫ୍ଟ ବଲ ଟାମ୍ପରିଂ ଅଭିଯୋଗରେ ଧରାପଡିଥିଲେ। ଅଧିନାୟକ ସ୍ମିଥ୍ ଓ ଉପଅଧିନାୟକ ଡେଭିଡ ୱାର୍ଣ୍ଣର ଏହି ଅଭିଯୋଗକୁ ସ୍ୱୀକାର କରିଥିଲେ। ଫଳରେ ଆଇସିସି କର୍ତ୍ତୃପକ୍ଷ ସ୍ମିଥ୍ ଓ ୱାର୍ଣ୍ଣରଙ୍କୁ ଏକ ବର୍ଷ ଲେଖାଏଁ ଓ ବାନ୍କ୍ରଫ୍ଟଙ୍କୁ ୯ ମାସ ପାଇଁ ବାସନ୍ଦ କରିଥିଲେ। ଆନ୍ତର୍ଜାତିକ କ୍ରିକେଟରୁ ବାସନ୍ଦ ହେବାପରେ ସ୍ମିଥ୍ ବର୍ତ୍ତମାନ ବିଭିନ୍ନ ରାଷ୍ଟ୍ରରେ ଟ୍ୱେଣ୍ଟି୨୦ ଟୁର୍ଣ୍ଣାମେଣ୍ଟ ଖେଳୁଛନ୍ତି। ସ୍ମିଥ୍ ୬୪ଟି ଟେଷ୍ଟ ଓ ୧୦୮ଟି ଦିନିକିଆ ଖେଳିସାରିଛନ୍ତି। ୨୦୧୫ ଆସେସ ସିରିଜ ପରେ ମାଇକେଲ କ୍ଲାର୍କ ଅବସର ନେବାରୁ ସ୍ମିଥ୍ ଅଷ୍ଟ୍ରେଲିଆ ଦଳର ଅଧିନାୟକ ନିଯୁକ୍ତ ହୋଇଥିଲେ।
