‘ଗଜପତି ଓ ମୁଖ୍ୟ ପ୍ରଶାସକ ଶଙ୍କରାଚାର୍ଯ୍ୟଙ୍କୁ ଭେଟିବା ପରେ ରଥଯାତ୍ରା ସମ୍ପର୍କରେ ନିଷ୍ପତ୍ତି’

ପୁରୀ: ପୁରୀରେ ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଯାତ୍ରା ହେବ କି ନାହିଁ ତାହାକୁ ନେଇ ଅନିଶ୍ଚିତତା ଲାଗି ରହିଛି। କରୋନା ଭୂତାଣୁ ଏଥର ରଥଯାତ୍ରା ବନ୍ଦ ରହିପାରେ ବୋଲି ଚର୍ଚ୍ଚା ହେଉଥିଲା। କିନ୍ତୁ ଶୁକ୍ରବାର ବସିଥିବା ଶ୍ରୀମନ୍ଦିର ପରିଚାଳନା କମିଟି ବୈଠକରେ ଏ ସମ୍ପର୍କ​‌ରେ ବିଶେଷ ଆଲୋଚନା ହୋଇଛି। ବୈଠକରେ ବିଭିନ୍ନ ନିଯୋଗମାନେ ଭିନ୍ନ ଭିନ୍ନ ମତ ଦେଇଛନ୍ତି। କେତେଜଣ ସଦସ୍ୟ ରଥଯାତ୍ରା କରିବା ସମର୍ଥନରେ ମତ ଦେଇଥିବାବେଳେ ଆଉ କେତେଜଣ କରିବା ଉଚିତ ନୁହେଁ ବୋଲି ମତ ଦେଇଛନ୍ତି। ତେବେ ଗଜପତି ମହାରାଜା ଏବଂ ଶ୍ରୀମନ୍ଦିର ମୁଖ୍ୟ ପ୍ରଶାସକ ଏ ନେଇ ଶଙ୍କରାଚାର୍ଯ୍ୟଙ୍କ ସହିତ ଆଲୋଚନା କରିବା ପରେ ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ପରିଚାଳନା କମିଟି ସଦସ୍ୟ ରଘୁନାଥ ମହାପାତ୍ର ଗଣମାଧ୍ୟମକୁ ସୂଚନା ଦେଇଛନ୍ତି।

ସୂଚନା ଅନୁସାରେ, ଆଜି ହୋଇଥିବା ଏହି ଗୁରୁତ୍ଵପୂର୍ଣ୍ଣ ବୈଠକରେ ରଥଯାତ୍ରା କରାଯିବା ଉଚିତ କି ନୁହେଁ ସେ ନେଇ ଆଲୋଚନା ହୋଇଥିଲା। କଟକଣା ସହିତ ରଥଯାତ୍ରା କରିବା ଲାଗି ଛତିଶା ନିଯୋଗ ପକ୍ଷରୁ ମତ ଦିଆଯାଇଥିଲା। ତେବେ ରଥଯାତ୍ରା କରାଯିବା ଉଚିତ ନୁହେଁ ବୋଲି ଆଉ କେତେଜଣ ସଦସ୍ୟ ମତ ଦେଇଥିଲେ। ସେହିପରି କଟକଣା ସହିତ ରଥଯାତ୍ରା କରାଗଲେ ଭକ୍ତଙ୍କୁ ବାରଣ କରିହେବନି ବୋଲି ଅନ୍ୟ କେତେଜଣ ସଦସ୍ୟ କହିଥିଲେ। ବୈଠକ ପରେ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ରଘୁନାଥ ମହାପାତ୍ର ଗଣମାଧ୍ୟମକୁ କହିଛନ୍ତି, ଶ୍ରୀମନ୍ଦିର ମୁଖ୍ୟ ପ୍ରଶାସକ ଏବଂ ଗଜପତି ମହାରାଜା ଦିବ୍ୟସିଂହଦେବ ଶଙ୍କରାଚାର୍ଯ୍ୟଙ୍କୁ ଭେଟିବେ। ଶଙ୍କରାଚାର୍ଯ୍ୟଙ୍କୁ ଭେଟିବା ପରେ ପରବର୍ତ୍ତୀ ନିଷ୍ପତ୍ତି ନିଆଯିବା ନେଇ ବୈଠକରେ ଆଲୋଚନା ହୋଇଛି।