ସାଲାଲା (ଓମାନ୍): ଏଠାରେ ଚାଲିଥିବା କନିଷ୍ଠ ଏସିଆ କପ୍ ପୁରୁଷ ହକି ଟୁର୍ଣ୍ଣାମେଣ୍ଟେର ଭାରତ ଚମ୍ପିଆନ୍ ହୋଇଛି। ଗୁରୁବାର ସଂଘର୍ଷପୂର୍ଣ୍ଣ ଫାଇନାଲରେ ପାରମ୍ପରିକ ପ୍ରତିଦ୍ବନ୍ଦ୍ବୀ ପାକିସ୍ତାନକୁ ୨-୧ ଗୋଲ୍ରେ ଭାରତ ପରାସ୍ତ କରିଛି। ପୂରା ମ୍ୟାଚ୍ରେ ପ୍ରାଧାନ୍ୟ ବିସ୍ତାରକରି ଭାରତ ଏହି ସହଜ ବିଜୟ ହାସଲ କରିଛି। ଲିଗ୍ ପର୍ଯ୍ୟାୟରେ ଭାରତ-ପାକିସ୍ତାନ ମୁକାବିଲା ଅମୀମାଂସିତ ରହିଥିଲା। ଏହି ବିଜୟ ସହ ଭାରତ ଟାଇଟଲ ବଜାୟ ରଖିବା ସହ ସର୍ବାଧିକ ୪ର୍ଥ ଥର କନିଷ୍ଠ ଏସିଆ କପ୍ ହକି ଟୁର୍ଣ୍ଣାମେଣ୍ଟ ଜିତିଛି।
ଆକ୍ରମଣାତ୍ମକ ଶୈଳୀରେ ଭାରତ ଖେଳ ଆରମ୍ଭକରି ୧୨ ମିନିଟରେ ଗୋଲ୍ ଦେଇଥିଲା। ଅଙ୍ଗଦବୀର ସିଂହ ଏହି ଗୋଲ୍ ଦେଇଥିଲେ। ୧୯ ମିନିଟରେ ଭାରତର ଅରାଇଜିତ ସିଂହ ହୁଣ୍ଡାଲ ୨ୟ ଗୋଲ୍ ଦେଇଥିଲେ। ମଧ୍ୟାନ୍ତର ସୁଦ୍ଧା ଭାରତ ୨-୦ ଗୋଲ୍ରେ ଆଗୁଆ ଥିଲା। ଦ୍ବିତୀୟାର୍ଦ୍ଧରେ ପାକିସ୍ତାନ ପ୍ରତ୍ୟାବର୍ତ୍ତନ କରି ୩୭ ମିନିଟରେ ଗୋଟିଏ ଗୋଲ୍ ସୁଝାଇଥିଲା। ବଶାରତ ଅଲୀ ଏହି ଗୋଲ୍ ଦେଇଥିଲେ। ୪ର୍ଥ କ୍ବାର୍ଟରରେ ଗୋଲ୍ ସୁଝାଇବା ପାଇଁ ପାକିସ୍ତାନ ଚାପ ପକାଇ ଖେଳିଥିଲା ଏବଂ ଏକାଧିକ ଗୋଲ୍ଦେବାର ସୁଯୋଗ ସୃଷ୍ଟି କରିଥିଲା। ଶେଷ କ୍ବାର୍ଟରରେ ପାକିସ୍ତାନ ୫ଟି ପେନାଲ୍ଟି କର୍ଣ୍ଣର ପାଇଥିଲେ ମଧ୍ୟ ସବୁତକ ନିଷ୍ଫଳ ହୋଇଥିଲା।
Comments are closed.