ଗାଜିଆବାଦ: ରୋଗାକ୍ରାନ୍ତ ମା’ବାପାଙ୍କୁ ପୁଅ ଚିକିତ୍ସା ନ କରି କରୋନା ହୋଇଥିବା ସନ୍ଦେହରେ ଘରେ ବନ୍ଦ କରି ତାଲା ପକାଇଦେଲା। ୨ ଦିନ ପରେ କବାଟ ଖୋଲିବାରୁ ମା’ବାପାଙ୍କ ମୃତଦେହ ମିଳିଲା। ଏଭଳି ଦୁଃଖଦ ଘଟଣା ଘଟିଛି ଉତ୍ତରପ୍ରଦେଶର ରଫିଆବାଦରେ। ପଡ଼ୋଶୀମାନେ ଏ ସମ୍ପର୍କରେ ପ୍ରଶାସନକୁ ଖବର ଦେବା ପରେ ସ୍ବାସ୍ଥ୍ୟ ବିଭାଗ ଅଧିକାରୀମାନେ ପହଞ୍ଚି ପରିବାରର ସମସ୍ତ ଲୋକଙ୍କର କୋଭିଡ ଟେଷ୍ଟ କରାଇବାକୁ ପଦକ୍ଷେପ ନେଇଛନ୍ତି।
ସୂଚନା ଅନୁସାରେ, ରଫିଆବାଦରେ ଜଣେ ବୃଦ୍ଧାଙ୍କ ଦେହ ଖରାପ ଥିଲା। ଶ୍ଵାସକ୍ରିୟାରେ କଷ୍ଟ ଅନୁଭବ କରିବା ପରେ ତାଙ୍କ ପୁଅ ତାଙ୍କୁ ସ୍ଥାନୀୟ ଅଞ୍ଚଳର ଏକ ଘରୋଇ ହସ୍ପିଟାଲକୁ ଚିକିତ୍ସା ପାଇଁ ନେଇଥିଲା। ଡାକ୍ତର ବୃଦ୍ଧାଙ୍କର କରୋନା ପରୀକ୍ଷା କରାଇବାକୁ ପରାମର୍ଶ ଦେଇଥିଲେ। କିନ୍ତୁ ପୁଅ ପରୀକ୍ଷା ନ କରାଇ ଘରକୁ ନେଇ ଆସି ଗୋଟିଏ ଘରେ ବନ୍ଦ କରି ରଖିଥିଲେ। ବୃଦ୍ଧାଙ୍କ ସ୍ବାମୀ ତାଙ୍କର ଦେଖାଶୁଣା କରିଥିଲେ। ଏହା ମଧ୍ୟରେ ତାଙ୍କ ଶରୀର ବି ଅସୁସ୍ଥ ହୋଇପଡ଼ିଲା। ପୁଅ ତାଙ୍କୁ ମେଡିକାଲ ନେବା ପରେ ଡାକ୍ତର ତାଙ୍କର ମଧ୍ୟ କରୋନା ପରୀକ୍ଷା କରାଇବାକୁ ପରାମର୍ଶ ଦେଇଥିଲେ। କିନ୍ତୁ ପୁଅ ତାଙ୍କୁ ଘରକୁ ଆଣି ମା’ ରହୁଥିବା ଘରେ ରଖି କବାଟ ବନ୍ଦ କରିଦେଇଥିଲେ। ଗତ ବୁଧବାର ବାପା ଏବଂ ଗୁରୁବାର ମା’ର ମୃତ୍ୟୁ ଘଟିଥିଲା।
ସ୍ଥାନୀୟ ସରକାରୀ ସ୍ବାସ୍ଥ୍ୟ କେନ୍ଦ୍ରର ସିଏମଓ ଡା. ଏନ.କେ. ଗୁପ୍ତା କୁହନ୍ତି, ମୃତ୍ୟୁର କାରଣ ଜଣାପଡ଼ି ନାହିଁ। କିନ୍ତୁ ଏକ ଟିମ୍ ପଠାଇ ଘଟଣାର ଯାଞ୍ଚ କରାଯିବ। ଯଦି ଘରେ ଅନ୍ୟ କୌଣସି ବ୍ୟକ୍ତିଙ୍କର କିଛି ଲକ୍ଷଣ ଦେଖାଯାଏ ତେବେ ସେମାନଙ୍କର ବି ଯାଞ୍ଚ କରାଯିବ।
