ସମାଜଲାଇଭ ଡେସ୍କ: ନୂଆପଡ଼ା ଉପନିର୍ବାଚନରେ ବିଜେପି ପ୍ରାର୍ଥୀ ଜୟ ଢୋଲକିଆ ବିଜୟଲାଭ କରିବା ପରେ ବିରୋଧୀ ବିଜେଡି ଏବଂ କଂଗ୍ରେସ ନିର୍ବାଚନ ପ୍ରକ୍ରିୟା ଉପରେ ପ୍ରଶ୍ନ ଉଠାଇଛନ୍ତି। ନିର୍ବାଚନରେ ଜାଲିଆତି ହୋଇଥିବା ବିରୋଧୀ ଅଭିଯୋଗ କରିଛନ୍ତି। ରବିବାର ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ ମଧ୍ୟ ନୂଆପଡ଼ାରେ କାରସାଦି ହୋଇଥିବା ଅଭିଯୋଗ କରିଛନ୍ତି।
ସ୍ନେହାଙ୍ଗିନୀ କହିଛନ୍ତି, ‘ଯେଉଁ ଭୋଟ ମେସିନରେ ଆସିଛି, ତାହାକୁ ସେ ଅଗ୍ରାହ୍ୟ କରୁଛନ୍ତି। ଫଳାଫଳକୁ ସେ ଖଣ୍ଡନ କରୁଛନ୍ତି। ନିର୍ବାଚନ କମିଶନଙ୍କୁ ନିନ୍ଦା କରୁଛନ୍ତି। ନିର୍ବାଚନ ଦିନ ସନ୍ଧ୍ୟା ୫ଟାରେ ୭୫% ଏବଂ ୭ଟାରେ ୭୭% ମତଦାନ ହୋଇଥିବା ନିର୍ବାଚନ କମିଶନ କହିଲେ। ପରଦିନ ସକାଳ ୧୦ଟାରେ ୮୧% ଏବଂ ମଧ୍ୟାହ୍ନ ୧୨ଟାରେ ୮୩.୪୫% ମତଦାନ ହୋଇଥିବା କହିଲେ। ନୂଆପଡ଼ାରେ ଅନେକଗୁଡ଼ିଏ ବିରଳ ରେକର୍ଡ ସୃଷ୍ଟି ହୋଇଛି। ସ୍ଵାଧୀନତା ପରଠୁ ନୂଆପଡ଼ାରେ ମତଦାନ ହାର ୭୦% ଭିତରେ ରହିଛି। ଉପନିର୍ବାଚନରେ କ’ଣ ଏମିତି ହୋଇଗଲା ଯେ, ୪୧ ବୁଧରେ ୯୦%ରୁ ଅଧିକ ମତଦାନ ହେଲା। ତେଣୁ କାରସାଦି ହୋଇଛି।’
