ଭୁବନେଶ୍ବର : ରାଜଧାନୀରୁ ସିମବକ୍ସ ଜବତ ଘଟଣାରେ କମିସନରେଟ ପୁଲିସ ତଦନ୍ତ ଜାରି ରଖିଛି। ଅଭିଯୁକ୍ତ ରାଜୁ ମଣ୍ଡଳଙ୍କୁ ଜେରା ବେଳେ ପୁଲିସକୁ ଜବତ ହୋଇଥିବା ସିମ୍ର ତଥ୍ୟ ମିଳିଛି। ସିମଗୁଡିକର ସିଡିଆର୍ ତଥ୍ୟ ଆସିଥିବା ଭୁବନେଶ୍ୱର ଉପାୟୁକ୍ତ ପ୍ରତୀକ ସିଂହ ସୂଚନା ଦେଇଛନ୍ତି। ସିମବକ୍ସ ଜରିଆରେ ଯେଉଁମାନଙ୍କୁ ଫୋନ୍ ଆସିଥିଲା ସେମାନଙ୍କୁ ଯୋଗାଯୋଗ କରାଯାଇଛି। ଟୋକନ କିମ୍ବା ଆପ୍ ମାଧ୍ୟମରେ ସିମବକ୍ସରେ କଲ କରୁଥିଲେ ଦେଶ ବାହାର ଲୋକ। ସବୁ ସିମ୍କାର୍ଡର ଗ୍ରାହକଙ୍କ ତଥ୍ୟ ମିଳିଛି। ତାକୁ ନେଇ ତଦନ୍ତ ଚାଲିଛି। ସେହିପରି ଜବତ ସବୁ ସିମ ପଶ୍ଚିମବଙ୍ଗରୁ କିଣା ଯାଇଛି। ସେଥିପାଇଁ ପୁଲିସର ଏକ ଦଳ ପଶ୍ଚିମବଙ୍ଗ ଯିବ। ଏଥିପାଇଁ ପଶ୍ଚିମବଙ୍ଗ ପୁଲିସ ସହ ଯୋଗାଯୋଗ କରାଯାଇଥିବା ସେ କହିଛନ୍ତି। ଶ୍ରୀ ସିଂହଙ୍କ ସୂଚନା ଅନୁସାରେ, ଏବେସୁଦ୍ଧା ଜବତ ହୋଇଥିବା ସମସ୍ତ ସିମ୍ବକ୍ସ ଚୀନରୁ ତିଆରି ହୋଇଛି। ସେଠାରୁ ଏଠାକୁ ଅଣାଯାଇଛି। ଉକ୍ତ ସିମ୍ବକ୍ସକୁ ପ୍ରକୃତ କେଉଁ କାର୍ଯ୍ୟରେ ବ୍ୟବହାର କରାଯାଉଥିଲା ସେନେଇ ତଦନ୍ତ ଚାଲିଛି। ସିମ୍ବକ୍ସ ଜରିଆରେ ଲୋକଙ୍କୁ କଲ୍ କରିବା ଲାଗି ସୁବିଧା ଦିଆଯାଉଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। କମ୍ ପଇସାରେ ବାହାର ଦେଶକୁ କଲ୍ କରିବାକୁ ଅଭିଯୁକ୍ତ ଲୋକଙ୍କୁ ସୁବିଧା ଦେଉଥିଲେ। ଏଥିଲାଗି ସେମାନେ କୁପନ ବ୍ୟବସ୍ଥା କରିଥିଲେ। କୁପନ ଦେଖାଇ ଲୋକ ସିମ୍ବକ୍ସ ଜରିଆରେ ବାହାର ଦେଶକୁ କଲ୍ କରୁଥିଲେ। ଏବାବଦରେ ସିମ୍ବକ୍ସ କାରବାରର କାର୍ପଟଦାର ଆସାଦୁର ଜମାନ ଲାଭବାନ ହେଉଥିଲା। ଅଧିକାଂଶ କଲ୍ ମଧ୍ୟ ଏସିଆରୁ ଆସିଥିବା ତଦନ୍ତରୁ ଜଣାପଡ଼ିଛି। ଘଟଣାର ଅଧିକ ତଦନ୍ତ ଲାଗି ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଓ ସିବିଆଇକୁ ଅବଗତ କରାଯାଇଛି ବୋଲି ସେ କହିଛନ୍ତି।
Popular Categories
Previous article
Next article