ସିଧୁଙ୍କୁ କପିଲ ଶର୍ମା ଶୋରୁ ବିଦା ପାଇଁ ସଲମାନଙ୍କୁ ନିବେଦନ କଲେ ଅଶୋକ ପଣ୍ଡିତ
ନୂଆଦିଲ୍ଲୀ : ପୁଲୱାମା ଆକ୍ରମଣ ଘଟଣାରେ ବିବାଦୀୟ ମନ୍ତବ୍ୟ ଦେଇ ସିଧୁଙ୍କୁ ଆଲୋଚନାର ଶରବ୍ୟ ହେବାକୁ ପଡିଛି। ସୋନି ଟିଭିରେ ପ୍ରସାରିତ ଲୋକପ୍ରିୟ ହାସ୍ୟରସ କାର୍ୟ୍ୟକ୍ରମ ‘ଦି କପିଲ ଶର୍ମା ଶୋ’ରେ ନିୟମିତ କଳାକାର ଥିବା ସିଧୁଙ୍କୁ ହଟାଇବା ପାଇଁ ବଲିଉଡ ପ୍ରଯୋଜକ ଅଶୋକ ପଣ୍ଡିତ ସଲମାନଙ୍କୁ ନିବେଦନ କରିଛନ୍ତି । କପିଲା ଶର୍ମା ଶୋକୁ ପ୍ରଯୋଜନା ଦେଉଥିବା ସଲମାନ ଖାନଙ୍କୁ ଅଶୋକ ପଣ୍ଡିତ ଟ୍ବିଟ କରି ଲେଖିଛନ୍ତି- କପିଲ ଶର୍ମା ଶୋରୁ ସିଧୁଙ୍କୁ ବିଦା କରନ୍ତୁ। ମାତ୍ର ଏନେଇ ସଲମାନଙ୍କ ତରଫରୁ କୌଣସି ପ୍ରତିକ୍ରିୟା ମଳିନାହିଁ।
ପାକିସ୍ତାନକୁ ସମର୍ଥନ କରି ସିଧୁ କହିଥିଲେ ଯେ ‘କିଛି ଲୋକଙ୍କ ପାଇଁ ଗୋଟିଏ ଦେଶକୁ କାହିଁକି ବଦନାମ କରାଯିବ ?’ ପଞ୍ଜାବର କ୍ୟାବିନେଟ ମନ୍ତ୍ରୀ ଥାଇ ସୁଦ୍ଧା ସିଧୁଙ୍କ ଏଭଳି ମନ୍ତବ୍ୟକୁ ଦେଶବାସୀ ଗ୍ରହଣ କରିପାରି ନ ଥିଲେ। ବିଭିନ୍ନ ମହଲରୁ ତାଙ୍କୁ ସମାଲୋଚନାର ଶରବ୍ୟ ହେବାକୁ ପଡ଼ିଥିଲା। ପୂର୍ବରୁ ପାକିସ୍ତାନ ପ୍ରଧାନମନ୍ତ୍ରୀ ଭାବେ ଇମ୍ରାନ ଖାଁଙ୍କ ଶପଥ ଗ୍ରହଣ ଉତ୍ସବରେ ଯୋଗଦେଇ ସେନାମୁଖ୍ୟ କ୍ବାମାର ଜାଭେଦ ବାଜୱାଙ୍କୁ କୋଳାଗ୍ରତ କରିବା ଘଟଣାରେ ମଧ୍ୟ ସେ ସମାଲୋଚିତ ହୋଇଥିଲେ। ସେତେବେଳେ ତାଙ୍କ ଉପରେ ଏହି ଟିଭି କାର୍ଯ୍ୟକ୍ରମ ଛାଡ଼ିବା ନେଇ ମଧ୍ୟ ଚାପ ପଡ଼ିଥିଲା।