ଶିମଳା : ଶ୍ରୀଖଣ୍ଡ ମହାଦେବ ଯାତ୍ରାରେ ୩ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ବର୍ତ୍ତମାନ ସୁଦ୍ଧା ମୃତ୍ୟୁର କାରଣ ଜଣାପଡିନାହିଁ । ଶ୍ବାସକ୍ରିୟାରେ କଷ୍ଟ ଅନୁଭବ କରିବାରୁ ସେମାନଙ୍କ ମୃତ୍ୟୁ ହୋଇଥିବା ଅନୁମାନ କରାଯାଉଛି । ଭୀମବହୀ, ବୌନସରୋବର ଏବଂ କୁଶଂର ଅଲଗା ଅଲଗା ସ୍ଥାନରେ ସେମାନଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରୁ ଦୁଇ ଜଣ ଦିଲ୍ଲୀ ଏବଂ ଅନ୍ୟ ଜଣେ ଶିମଳାର ବାସିନ୍ଦା ବୋଲି କୁହାଯାଉଛି ।
ଜଣେ ଅଧିକାରୀଙ୍କ ସୂଚନା ଅନୁଯାୟୀ, ଶ୍ରୀଖଣ୍ଡ ମହାଦେବ ଯାତ୍ରାର ଶେଷ ଦିନରେ ଶନିବାର ବିଳମ୍ବିତ ରାତି ପ୍ରାୟ ୧ଟା ୩୦ରେ ଏହି ୩ ଜଣଙ୍କ ମୃତ୍ୟୁ ହୋଇଛି । ସୂଚନା ପାଇ ଘଟଣାସ୍ଥଳରେ ପୁଲିସ ଏବଂ ପ୍ରଶାସନିକ ଅଧିକାରୀ ପହଞ୍ଚି ମୃତଦେହକୁ ଜବତ କରି ବେସ୍ କ୍ୟାମ୍ପ ସିଂହଗାଡ଼ ଅଣାଯାଇଛି।
ଶ୍ରୀଖଣ୍ଡ ମହାଦେବଙ୍କ ଏହି ଐତିହାସିକ ଯାତ୍ରା ଜୁଲାଇ ୧୫ରେ ଆରମ୍ଭ ହୋଇଥିଲା। ଜୁଲାଇ ୨୫ରେ ଯାତ୍ରୀଙ୍କ ଶେଷ ପଞ୍ଚୀକରଣ କରାଯାଇଥିଲା। ଏହା ପରେ ଯାତ୍ରା ବନ୍ଦ କରି ଦିଆଯାଇଥିଲା । ତେବେ ଏଠାରେ ପ୍ରଶ୍ନ ଉଠୁଛି ଯେ, ଯଦି ଶ୍ରୀଖଣ୍ଡ ଯାତ୍ରା ବନ୍ଦ କରି ଦିଆଯାଇଥିଲା ତେବେ ଯାତ୍ରୀ କିପରି ଗଲେ ।
