ସମାଜ ଡିଜିଟାଲ ଡେସ୍କ: ଆସନ୍ତା ୨୦୨୫ରେ ପାକିସ୍ତାନରେ ଆୟୋଜିତ ହେବ ଆଇସିସି ଚାମ୍ପିୟନ୍ସ ଟ୍ରଫି ଟୁର୍ନାମେଣ୍ଟ। ହେଲେ ଏଥିରେ ଅଂଶଗ୍ରହଣ କରିବାକୁ ଭାରତ ଯଦିଓ ମନା କରିନାହିଁ, ତେବେ ପାକିସ୍ତାନରେ ଭାରତୀୟ ଟିମ ଖେଳିବ ନାହିଁ ବୋଲି ଭାରତୀୟ କ୍ରିକେଟ କଂଟ୍ରୋଲ ବୋର୍ଡ (ବିସିସିଆଇ) ସ୍ପଷ୍ଟ କରିଛି। ଫଳରେ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଟୁର୍ନାମେଣ୍ଟକୁ ଦୁବାଇରେ ଆୟୋଜନ କରିବାକୁ ଚିନ୍ତା କରୁଛି। ଏପରି ସ୍ଥିତିରେ ପାକ୍ କ୍ରିକେଟପ୍ରେମୀ ନିରାଶ ହୋଇପଡ଼ିଛନ୍ତି। ୧୯୯୬ ପରଠାରୁ ପ୍ରଥମ ଥର ଲାଗି ଆଇସିସି ପକ୍ଷରୁ କୌଣସି ଟୁର୍ନାମେଣ୍ଟ ପାକିସ୍ତାନରେ ଆୟୋଜନ ହେବାକୁ ଯାଉଥିବାବେଳେ ଭାରତୀୟ ଟିମ ପାଇଁ ପାକ୍ କ୍ରିକେଟପ୍ରେମୀଙ୍କ ଆଶା ମଉଳିବାକୁ ବସିଛି। ତେଣୁ ଭାରତୀୟ ଟିମକୁ ପାକିସ୍ତାନ ଆସିବାକୁ ନିବେଦନ କରୁଛନ୍ତି କ୍ରିକେଟପ୍ରେମୀ। କେବଳ କ୍ରିକେଟପ୍ରେମୀ ନୁହନ୍ତି, ପାକ୍ ଟିମ୍ର ପୂର୍ବତନ ଖେଳାଳି ବି ଭାରତକୁ ଅନୁରୋଧ କରୁଥିବା ଦେଖିବାକୁ ମିଳିଛି।
ପାକିସ୍ତାନର ପୂର୍ବତନ କ୍ରିକେଟର ସୋଏବ ମଲ୍ଲିକ ଭାରତକୁ ଅନୁରୋଧ କରି କହିଛନ୍ତି, ଆମେ ବହୁତ ଭଲ ଲୋକ। ଦୟାକରି ଆମ ଦେଶକୁ ଖେଳିବାକୁ ଆସନ୍ତୁ। ଆମେ ଆତିଥ୍ୟତାରେ କୌଣସି ହେଳା କରିବୁ ନାହିଁ। ସେ ଆହୁରି କହିଛନ୍ତି, ଭାରତ ଏବଂ ପାକିସ୍ତାନ ମଧ୍ୟରେ ଥିବା ରାଜନୈତିକ ବିବାଦ ପୃଥକ ଭାବେ ସମାଧାନ ହେବା ଉଚିତ। କ୍ରୀଡ଼ାକୁ ଏଭଳି ପ୍ରସଙ୍ଗରୁ ବାଦ୍ ଦେବା ଦରକାର। ପାକିସ୍ତାନ ୨୦୨୩ରେ ଦିନିକିଆ ବିଶ୍ଵକପ ଖେଳିବାକୁ ଭାରତ ଗସ୍ତ କରିଥିଲା। ବର୍ତ୍ତମାନ ଭାରତ ବି ପାକିସ୍ତାନ ଖେଳିବାକୁ ଆସିବା ଉଚିତ।
Comments are closed.