ସାଲେମ : ଦକ୍ଷିଣ ଭାରତର କୁଖ୍ୟାତ ଅପରାଧୀ ତଥା ଆତଙ୍କୀ ଶଙ୍କର ଭାବେ ପରିଚିତ ଏମ୍ ଜୟଶଙ୍କର ମଙ୍ଗଳବାର ଆତ୍ମହତ୍ୟା କରିଛି । କର୍ଣ୍ଣାଟକ ଓ ତାମିଲନାଡୁରେ ଆତଙ୍କୀ ଶଙ୍କର ନାମରେ ୩୦ରୁ ଅଧିକ ବଳାତ୍କାର ଓ ୧୫ ହତ୍ୟା ଅଭିଯୋଗ ରହିଛି । ଶଙ୍କର ବେଙ୍ଗାଲୁର ଉପକଣ୍ଠରେ ଥିବା ପାରାପ୍ପାନ୍ନା ଅଗ୍ରହାରା କାରାଗାରରେ ସୋମବାର ବିଳମ୍ବିତ ରାତିରେ ଏକ ବ୍ଲେଡରେ ନିଜ ବେକକୁ କାଟି ଦେଇଥିଲା। ସଙ୍ଗେ ସଙ୍ଗେ ତାକୁ ସ୍ଥାନୀୟ ଡାକ୍ତରଖାନାକୁ ନିଆଯାଇଥିଲା । ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ସକାଳେ ତାର ମୃତ୍ୟୁ ଘଟିଛି । ଶଙ୍କର ୨୦୦୯ରୁ ୨୦୧୧ ମଧ୍ୟରେ ଦକ୍ଷିଣ ଭାରତରେ ଆତଙ୍କ ଖେଳାଇଥିଲା । କେବଳ ଏହି ୨ ବର୍ଷରେ ତା ନାମରେ ୧୩ରୁ ଅଧିକ ବଳାତ୍କାର ଓ ହତ୍ୟା ମାମଲା ରୁଜୁ ହୋଇଥିଲା । ବିଭିନ୍ନ ଅପରାଧୀକ ଅଭିଯୋଗରେ ଶଙ୍କରକୁ ଗିରଫ କରାଯାଇ ଜେଲ ପଠାଯାଇଥିଲା । ଶଙ୍କର ୨୦୧୩ ସେପ୍ଟେମ୍ବର ୧ରେ ଏକ ବାଉଂଶ ଓ କମ୍ବଳ ସାହଯ୍ୟରେ ଜେଲ୍ର ଉଚ୍ଚସ୍ତରୀୟ ସୁରକ୍ଷା ବ୍ୟବସ୍ଥାକୁ ଭାଙ୍ଗି ଖସିଯିବାରେ ସଫଳ ହୋଇଥିଲା । ଶେଷରେ ୨୦୧୩ ସେପ୍ଟେମ୍ବର ୬ରେ ବାଙ୍ଗାଲୁର ପୁଲିସ୍ କୁଡଲିଗେଟ ନିକଟରୁ ଶଙ୍କରକୁ ଗିରଫ କରିଥିଲା । ସେବେଠାରୁ ଜୟଶଙ୍କର ଜେଲରେ ରହିଥିଲା । ଜୟଶଙ୍କରର ଜୀବନୀକୁ ନେଇ ୨୦୧୭ରେ କାନ୍ନାଡା ଚଳଚ୍ଚିତ୍ର ‘ସାଇକୋ ଶଙ୍କର’ ନିର୍ମିତ ହୋଇଛି । ଜୟଶଙ୍କର ମୃତ୍ୟୁକୁ ନେଇ ଜେଲ କର୍ତ୍ତୃପକ୍ଷ ତଦନ୍ତ ନିର୍ଦେଶ ଦେଇଛନ୍ତି ।
