ମୁମ୍ବଇ : ଦର୍ଶକଙ୍କୁ ‘ମିଶନ ମଙ୍ଗଳ’ ଭଳି ହିଟ୍ ଚଳଚ୍ଚିତ୍ର ଭେଟି ଦେବା ପରେ ବଲିଉଡ଼ ଅଭିନେତ୍ରୀ ବିଦ୍ୟା ବାଲନ ଏବେ ଅନ୍ୟ ଏକ ପ୍ରୋଜେକ୍ଟର ପ୍ରସ୍ତୁତିରେ ଲାଗି ପଡ଼ିଛନ୍ତି। ଗଣିତ ଯାଦୁକର ଶକୁନ୍ତଳା ଦେବୀଙ୍କ ଉପରେ ନିର୍ମାଣ ହେଉଥିବା ଚଳଚ୍ଚିତ୍ର ‘ଶକୁନ୍ତଳା ଦେବୀ-ହ୍ୟୁମାନ କମ୍ପ୍ୟୁଟର’ରେ ବିଦ୍ୟା ମୁଖ୍ୟ ଭୂମିକାରେ ଅଭିନୟ କରୁଛନ୍ତି। ଚଳଚ୍ଚିତ୍ରର ଟିଜର ଓ ବିଦ୍ୟାଙ୍କ ପ୍ରଥମ ଲୁକ୍ ସୋମବାର ରିଲିଜ୍ ହୋଇଛି। ବିଦ୍ୟା ନିଜେ ସାମାଜିକ ଗଣମାଧ୍ୟମରେ ଚଳଚ୍ଚିତ୍ରର ଟିଜର୍ ଶେୟାର କରିଛନ୍ତି। ଏହି ଟିଜରରେ ଶକୁନ୍ତଳା ଦେବୀଙ୍କ ପରିଚୟ ଦର୍ଶାଯାଇଛି। ଏହାସହିତ ତାଙ୍କ ପ୍ରତିଭା ବିଷୟରେ ମଧ୍ୟ ସାମାନ୍ୟ ଅବଗତ କରାହୋଇଛି। ଏଥିରେ ବିଦ୍ୟା ଶାଢୀ ଓ ବବ୍ ହେୟାରକଟ୍ରେ ଶକୁନ୍ତଳା ଦେବୀଙ୍କ ଭଳି ଦେଖାଯାଉଛନ୍ତି। ଏହି ଚଳଚ୍ଚିତ୍ରର ନିର୍ଦ୍ଦେଶନା ଭାର ଅନୁ ମେନନ ବହନ କରିଛନ୍ତି।
କିଏ ଏହି ଶକୁନ୍ତଳା ଦେବୀ?
ଶକୁନ୍ତଳା ଦେବୀ ଜଣେ ଭାରତୀୟ ଲେଖିକା ଓ ମେଣ୍ଟଲ୍ କାଲକୁଲେଟର ଥିଲେ। ମସ୍ତିଷ୍କରେ ହିଁ ସବୁକିଛି ଗଣନା ତଥା ହିସାବ କରିବା ଭଳି ଅଦ୍ଭୁତ କ୍ଷମତାର ଅଧିକାରୀ ହୋଇଥିବାରୁ ସେ ହ୍ୟୁମାନ୍ କମ୍ପ୍ୟୁଟର ନାଁରେ ପରିଚିତ ଥିଲେ। ଗିନୀଜ୍ ବୁକ୍ ଅଫ୍ ୱାର୍ଲଡ୍ ରେକର୍ଡ଼ସ୍ରେ ମଧ୍ୟ ତାଙ୍କ ନାମ ସ୍ଥାନ ପାଇଛି।
