ନୂଆଦିଲ୍ଲୀ: ଭାରତର ଔଷଧ ମହାନିୟନ୍ତ୍ରକ (ଡିସିଜିଆଇ) ସେରମ୍ ଇନଷ୍ଟିଚ୍ୟୁଟ ଅଫ ଇଣ୍ଡିଆ (ଏସଆଇଆଇ)କୁ ରୁଷୀୟ କୋଭିଡ ଟିକା ସ୍ପୁଟନିକ ଭି ଉତ୍ପାଦନ ପାଇଁ ଅନୁମତି ପ୍ରଦାନ କରିଛନ୍ତି। ଏହି ଟିକା ଉତ୍ପାଦନ ସହିତ ତାହାର ଯାଞ୍ଚ, ମାନବୀୟ ପରୀକ୍ଷା ଏବଂ ଫଳାଫଳ ବିଶ୍ଳେଷଣ କରାଯିବ। ସରକାରୀ ସୂତ୍ରରୁ କୁହାଯାଇଛି ଯେ ହାଇଦରାବାଦସ୍ଥିତ ଏହି କମ୍ପାନୀକୁ ଶୁକ୍ରବାର ଅନୁମତି ମିଳିଛି। ମସ୍କୋର ଗାମାଲେୟା ରିସର୍ଚ୍ଚ ଇନଷ୍ଟିଚ୍ୟୁଟ ଅଫ ଏପିଡେମିଓଲୋଜି ଆଣ୍ଡ ମାଇକ୍ରୋବାୟୋଲୋଜି ସହିତ ମିଶି ସେରମ୍ ଏହି ଟିକା ଉତ୍ପାଦନ କରିବ। ଅବଶ୍ୟ ଏଥିପାଇଁ ଡିସିଜିଆଇ ଚାରିଟି ସର୍ତ୍ତ ରଖିଛନ୍ତି। ସେରମ ଇନଷ୍ଟିଚ୍ୟୁଟ ଏଥିପାଇଁ ଗାମାଲେୟା ଇନଷ୍ଟିଚ୍ୟୁଟ ସହିତ ହୋଇଥିବା ରାଜିନାମାର ନକଲ ଦାଖଲ କରିବ। ତାହାସହିତ ସେଲ୍ ବ୍ୟାଙ୍କ ଏବଂ ଭାଇରସ ଷ୍ଟକ ଆମଦାନୀ ନିମନ୍ତେ ଆରସିଜିଏମଙ୍କ ଅନୁମୋଦନର ନକଲ ସହିତ ସ୍ପୁଟନିକ ଟିକା ନିମନ୍ତେ ଭାଇରାଲ ଭେକ୍ଟର ଉପରେ ଗବେଷଣା ଓ ବିକାଶ ସମ୍ପର୍କିତ ଆରସିଜିଏମ ଅନୁମତିର ଏକ ନକଲ ଦାଖଲକରିବ। ରୁଷିଆର ଏହି ଟିକା ସଂପ୍ରତି ଡ.ରେଡିସ ଲାବୋରେଟୋରୀ ଦ୍ୱାରା ଭାରତରେ ଉତ୍ପାଦନ କରାଯାଉଛି।
Comments are closed.