ଲଣ୍ଡନ: ବ୍ରିଟେନରେ ବ୍ୟାପୁଥିବା କରୋନା ଭୂତାଣୁର ନୂଆ ଷ୍ଟ୍ରେନକୁ ନେଇ ବୈଜ୍ଞାନିକମାନେ ଚେତାବନୀ ଦେଇଛନ୍ତି। ଏହି ଷ୍ଟ୍ରେନ ପୁରୁଣା ଭୂତାଣୁଠାରୁ ୫୬% ଅଧିକ ବିପଜ୍ଜନକ ହୋଇପାରେ ଏବଂ ଏହା ଦ୍ବାରା ୨୦୨୧ରେ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ବୋଲି ବୈଜ୍ଞାନିକମାନେ କରିଥିବା ନୂତନ ଗବେଷଣାରୁ ତଥ୍ୟ ପାଇଛନ୍ତି। ବ୍ରିଟେନରେ ତୁରନ୍ତ ଟିକାକରଣ କରାଯିବା ଜରୁରୀ ବୋଲି ସେମାନେ ପରାମର୍ଶ ଦେଇଛନ୍ତି।
ଲଣ୍ଡନ ସ୍କୁଲ ଅଫ ହାଇଜିନ ଆଣ୍ଡ ଟ୍ରପିକାଲ ମେଡିସିନରେ ସେଣ୍ଟର ଫର ମ୍ୟାଥମେଟିକାଲ ମଡେଲିଂ ଅଫ ଇନ୍ଫେକ୍ସିଅସ ଡିଜିଜ ପକ୍ଷରୁ ପ୍ରକାଶିତ ଗବେଷଣା ରିପୋର୍ଟ ଅନୁସାରେ, ନଭେମ୍ବରରେ ଦକ୍ଷିଣ-ପୂର୍ବ ଇଂଲଣ୍ଡରେ ଦ୍ରୁତଗତିରେ ବ୍ୟାପିଥିବା ଏହି ଷ୍ଟ୍ରେନ୍ କାରଣରୁ ଆଗାମୀ ବର୍ଷ କୋଭିଡ-୧୯ ଯୋଗୁ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବ ଏବଂ ମୃତ୍ୟୁ ସଂଖ୍ୟା ଅଧିକ ହେବ।
ଗବେଷକମାନେ ଚେତାବନୀ ଦେଇ କହିଛନ୍ତି, ନଭେମ୍ବରରେ ଇଂଲଣ୍ଡରେ ଲାଗୁ ହୋଇଥିବା ଲକଡାଉନର ସୁଫଳ ସେଯାଏ ମିଳିବ ନାହିଁ, ଯେପର୍ଯ୍ୟନ୍ତ ପ୍ରାଥମିକ ସ୍କୁଲ, ମାଧ୍ୟମିକ ସ୍କୁଲ ଏବଂ ବିଶ୍ଵବିଦ୍ୟାଳୟଗୁଡ଼ିକ ବନ୍ଦ କରାଯିବ ନାହିଁ। ପ୍ରତିବନ୍ଧକରେ ଯଦି ସାମାନ୍ୟ କୋହଳ କରାଯିବ, ତେବେ ଏହାଦ୍ବାରା ସଂକ୍ରମିତଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇବ।
ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନ୍ କ୍ରିସମାସ ଛୁଟିକୁ ଦୃଷ୍ଟିରେ ରଖି କଟକଣାକୁ କଡ଼ାକଡ଼ି ଭାବେ ପାଳନ କରିବା ଲାଗି ନିର୍ଦେଶ ଦେଇଛନ୍ତି। ନୂଆ ଷ୍ଟ୍ରେନ ପୁରୁଣା ଷ୍ଟ୍ରେନଠାରୁ ୭୦ ପ୍ରତିଶତ ଅଧିକ ସଂକ୍ରାମକ ହୋଇପାରେ। ବର୍ତ୍ତମାନ ସୁଦ୍ଧା ୪୦ଟି ଦେଶ ବ୍ରିଟେ ଉପରେ ଯାତାୟାତ ପ୍ରତିବନ୍ଧକ ଲଗାଇ ସାରିଛନ୍ତି, ୟୁରୋପୀୟ ଦେଶଗୁଡ଼ିକର ସରକାର ନିଜର ପ୍ରତିବନ୍ଧକରେ ସାମାନ୍ୟ କୋହଳ କରିବା ଆରମ୍ଭ କରିଛନ୍ତି।
ଅନ୍ୟପଟେ ବାୟୋଏନଟେକ୍ର ସହପ୍ରତିଷ୍ଠାତା କହିଛନ୍ତି, ଆମ ଭ୍ୟାକ୍ସିନ ଏହି ମୁଟେଟେ୍ଡ ନୂଆ ଷ୍ଟ୍ରେନ ଉପରେ ବି ପ୍ରଭାବଶାଳୀ ହୋଇପାରେ। ଯଦି ନ ହୁଏ, ତେବେ ଆଗାମୀ ୬ ସପ୍ତାହ ମଧ୍ୟରେ ନୂଆ ଷ୍ଟ୍ରେନ ପାଇଁ ବି ଭ୍ୟାକ୍ସିନ୍ ପ୍ରସ୍ତୁତ କରିଦିଆଯିବ।
