ଭୁବନେଶ୍ୱର: ଛାତ୍ରଛାତ୍ରୀ ଦ୍ବନ୍ଦ୍ବରେ ରହିବାର କିଛି କାରଣ ନାହିଁ। ଏବେ କବେଳ ପାଠପଢାରେ ମନୋନିବେଶ କରନ୍ତୁ। ମୁଖ୍ୟମନ୍ତ୍ରୀଙ୍କ ନିର୍ଦେଶ ଅନୁଯାୟୀ ଜୁନ୍ ମାସ ପ୍ରଥମ ସପ୍ତାହରେ ସ୍ଥିତି ଦେଖି ପରୀକ୍ଷା ହେବ କି ନାହିଁ ସେ ସମ୍ପର୍କରେ ନିଷ୍ପତ୍ତି ନିଆଯିବ। ଗୁରୁବାର +୨ ପରୀକ୍ଷା ବାତିଲ ଦାବିରେ ଛାତ୍ରଛାତ୍ରୀଙ୍କ ବିକ୍ଷୋଭ ପରେ ନିଜ ପ୍ରତିକ୍ରିୟା ରଖି ଏପରି କହିଛନ୍ତିି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ।
ଏହାସହିତ ମନ୍ତ୍ରୀ କହିଛନ୍ତି ଯେ, ରାଜ୍ୟରେ ମାଟ୍ରିକ୍ ପରୀକ୍ଷା ବନ୍ଦ ହୋଇଯାଉ ବୋଲି କାହାର ଇଚ୍ଛା ନ ଥିଲା। ପରୀକ୍ଷା କରିବା ପାଇଁ ବ୍ୟାପକ ପ୍ରସ୍ତୁତି ମଧ୍ୟ ହୋଇଥିଲା। କିନ୍ତୁ ପରିସ୍ଥିତି ଏମିତି ହେଲା ଯେ ବାଧ୍ୟ ହୋଇ ଆମକୁ ପରୀକ୍ଷା ବାତିଲ କରିବାକୁ ପଡ଼ିଲା। କିନ୍ତୁ ଯୁକ୍ତ +୨ ପିଲା ବୟସରେ ବଡ଼। ତେଣୁ ସେମାନେ ଦ୍ବନ୍ଦ୍ବରେ ନ ରହି ପାଠପଢ଼ାରେ ମନୋନିବେଶ କରିବା ଆବଶ୍ୟକ। ଜୁନ୍ ମାସ ପ୍ରଥମ ସପ୍ତାହରେ ବାତାବରଣ ଠିକ୍ ହେଲେ ପରୀକ୍ଷା ନେଇ ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ କହିଛନ୍ତି।
ସୂଚନାଯୋଗ୍ୟ, ମାଟ୍ରିକ ପରି +୨ ପରୀକ୍ଷାକୁ ମଧ୍ୟ ବାତିଲ କରାଯାଉ ବୋଲି ଦାବି କରି ଛାତ୍ରଛାତ୍ରୀମାନେ ଆଜି ଲୋୟର ପିଏମ୍ଜିରେ ବିକ୍ଷୋଭ ପ୍ରଦର୍ଶନ କରିଥିଲେ। ସେମାନଙ୍କ କହିବାନୁସାରେ, କରୋନା ପ୍ରକୋପକୁ ଦୃଷ୍ଟିରେ ରଖି ଛାତ୍ରଛାତ୍ରୀଙ୍କ ସୁରକ୍ଷା ପାଇଁ ମାଟ୍ରିକ୍ ପିଲାମାନଙ୍କ ପରୀକ୍ଷା ବାତିଲ କରି ଦିଆଗଲା। କିନ୍ତୁ +୨ ପରୀକ୍ଷାକୁ ସ୍ଥଗିତ ରଖାଗଲା। ଏହାଦ୍ବାରା ଆମର ମାନସିକ ଚାପ ବୃଦ୍ଧି ପାଉଛି। ଏହାସହିତ କରୋନା କାଳରେ କିଭଳି ଆମେ ଯାଇ ପରୀକ୍ଷା ଦେବୁ। ଆମକୁ କ’ଣ କରୋନା ହେବନି। ତେଣୁ ସରକାର ଆମ ସୁରକ୍ଷା ପ୍ରତି ମଧ୍ୟ ଧ୍ୟାନ ଦିଅନ୍ତୁ ଓ ପରୀକ୍ଷା ବାତିଲ କରନ୍ତୁ ବୋଲି ଛାତ୍ରଛାତ୍ରୀମାନେ କହିଛନ୍ତି।
