ନୂଆଦିଲ୍ଲୀ: କରୋନା ପରୀକ୍ଷା କରିବା ଲାଗି ଘରୋଇ ଲାବରେଟୋରିଗୁଡ଼ିକ ୪୫୦୦ ଟଙ୍କା ନେଉଛନ୍ତି। ଏହା ଉପରେ ଅସନ୍ତୋଷ ବ୍ୟକ୍ତ କରିଛନ୍ତି ସୁପ୍ରିମକୋର୍ଟ। ଘରୋଇ ଲାବରେଟୋରିଗୁଡ଼ିକ ମନ ମୁତାବକ ଟଙ୍କା ଅସୁଲ କରିପାରିବେ ନାହିଁ। କରୋନା ପରୀକ୍ଷା ପାଇଁ ଏହି ଲାବରେଟୋରିଗୁଡ଼ିକୁ ଟଙ୍କା ନେବା ଲାଗି ଅନୁମତି ଦିଆଯିବା ଉଚିତ ନୁହେଁ। ସର୍ବୋଚ୍ଚ ନ୍ୟାୟାଳୟ ଏହି ପ୍ରସଙ୍ଗରେ ଆଦେଶ ଜାରି କରିବେ ବୋଲି କହିଛନ୍ତି।
ଏ ସମ୍ପର୍କିତ ଏକ ଆବେଦନର ଶୁଣାଣି କରି ଜଷ୍ଟିସ ଅଶୋକ ଭୂଷଣ ଏବଂ ଜଷ୍ଟିସ ଏସ. ରବୀନ୍ଦ୍ର ଭଟ୍ଟଙ୍କୁ ନେଇ ଗଠିତ ଖଣ୍ଡପୀଠ କହିଥିଲେ, ଘରୋଇ ଲାବରେଟୋରିଗୁଡ଼ିକୁ କୋଭିଡ-୧୯ ପରୀକ୍ଷା ପାଇଁ ଟଙ୍କା ନେବା ଲାଗି ଅନୁମତି ଦିଆଯାଉ ନାହିଁ। ସରକାର ଏହି ପରୀକ୍ଷା ମାଗଣାରେ କରାଇବା ଉଚିତ। ଶୁଣାଣି ସମୟରେ ଖଣ୍ଡପୀଠ କେନ୍ଦ୍ର ସରକାରଙ୍କ ପକ୍ଷରୁ ଉପସ୍ଥିତ ଥିବା ସଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ପରାମର୍ଶ ଦେଇ କହିଥିଲେ ଯେ, ଘରୋଇ ଲ୍ୟାବ୍ଗୁଡ଼ିକୁ ପରୀକ୍ଷା ପାଇଁ ସରକାର ଅଧିକ ଟଙ୍କା ଦିଅନ୍ତୁ ନାହିଁ। କିଛି ଏଭଳି ବ୍ୟବସ୍ଥା କରନ୍ତୁ, ଯାହା ଦ୍ବାରା ସରକାର ଘରୋଇ ଲ୍ୟାବଗୁଡ଼ିକୁ ପରୀକ୍ଷା ରାଶି ଫେରାଇ ପାରିବେ। ସଲିସିଟର ଜେନେରାଲ ଏ ଦିଗରେ ସରକାର ଆବଶ୍ୟକ ପଦକ୍ଷେପ ନେବେ ବୋଲି କହିଥିଲେ। ସରକାର ନିଜ ତରଫରୁ ସମସ୍ତ ପ୍ରକାର ପ୍ରୟାସ କରୁଛନ୍ତି ବୋଲି ସେ ଖଣ୍ଡପୀଠଙ୍କୁ ଜଣାଇଥିଲେ। ସେ କହିଥିଲେ, ୧୧୮ଟି ଲାବରେଟୋରିରେ ପ୍ରତିଦିନ ୧୫ ହଜାର ପରୀକ୍ଷା କରାଯାଉଥିଲା। ଏବେ ୪୭ଟି ଘରୋଇ ଲ୍ୟାବକୁ ପରୀକ୍ଷା ପାଇଁ ଅନୁମତି ଦିଆଯାଇଛି। ଆଗକୁ ଆହୁରି କେତେ ଲ୍ୟାବର ସହାୟତା ନିଆଯିବ ତାହା ଜଣାପଡ଼ି ନାହିଁ।
ସୂଚନାଯୋଗ୍ୟ, ସରକାରୀ ଏବଂ ଘରୋଇ ଲ୍ୟାବରେ ମାଗଣାରେ କରୋନା ଭୂତାଣୁର ପରୀକ୍ଷା କରିବା ଲାଗି କେନ୍ଦ୍ର ସରକାରଙ୍କୁ ନିର୍ଦେଶ ଦେବା ସକାଶେ ଅନୁରୋଧ କରି ଗତ ମାର୍ଚ୍ଚ ୩୧ ତାରିଖରେ ସୁପ୍ରିମକୋର୍ଟରେ ଏକ ପିଟିଶନ ଦାୟର ହୋଇଥିଲା।
