ସମ୍ବଲପୁର: ମୁଖ୍ୟମନ୍ତ୍ରୀଙ୍କ ଅନୁରୋଧରେ ବୁଧବାର ସମ୍ବଲପୁର ଜିଲାରେ ଗ୍ରାମଞ୍ଚଳ ଠାରୁ ଆରମ୍ଭ କରି ସହରାଞ୍ଚଳ ପର୍ଯ୍ୟନ୍ତ ଓ ସମସ୍ତ ସରକାରୀ ଏବଂ ବେସରକାରୀ କାର୍ଯ୍ୟାଳୟ ଗୁଡିକରେ ବିଭିନ୍ନ ସ୍ଥରରେ କରୋନା ଯୋଦ୍ଧା ମାନଙ୍କ ପାଇଁ ନୀରବ ପ୍ରାର୍ଥନା ଓ ଶପଥ ପାଠ କରାଯାଇଛି। ବିଶେଷ କରି କରୋନା ଯୋଦ୍ଧା ମାନଙ୍କର ମାନବଜାତି ପ୍ରତି ସର୍ବୋଚ୍ଚ ବଳିଦାନକୁ ସ୍ମରଣ କରିବା ଓ ସମ୍ମାନ ଜଣାଇବା ପାଇଁ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ ଏଥିରେ ସମସ୍ତେ ସ୍ୱତଃପ୍ରବୃତ୍ତ ଭାବରେ ସାମିଲ ହୋଇଥିଲେ। ଏହି ଅବସରରେ ସ୍ଥାନୀୟ ଜିଏମ କଲେଜ ଛକରେ ଏକ ଅଭିନବ ଦୃଶ୍ୟ ଦେଖିବାକୁ ମିଳିଥିଲା।
ସନ୍ଧ୍ୟା ସମୟରେ ୬ଟା ସମୟରେ ଟ୍ରାଫିକ କର୍ମଚାରୀ ମାନେ ନୀରବ ପ୍ରାର୍ଥନା ଓ ଶପଥ ପାଠ କରୁଥିବାର ଦେଖି ସେହି ରାସ୍ତାରେ ଟ୍ରାଫିକ ସ୍ୱତଃପ୍ରବୃତ୍ତ ଭାବରେ ଠପ ହୋଇଯାଇଥିଲା ଏବଂ ଜନତା ସ୍ୱତଃପ୍ରବୃତ୍ତ ଭାବରେ ଛିଡା ହୋଇ କରୋନା ଯୋଦ୍ଧା ମାନଙ୍କୁ ସମ୍ମାନ ଜଣାଇଥିଲେ। ଏହା ସହିତ ସମ୍ବଲପୁର ଜିଲାବ୍ୟାପି ପୁଲିସ ବିଭାଗ ପକ୍ଷରୁ ଜିଲା ମୁଖ୍ୟାଳୟ ସମେତ ସମସ୍ତ ଥାନା ଗୁଡିକରେ ମଧ୍ୟ ନୀରବ ପ୍ରାର୍ଥନା ଓ ଶପଥ ପାଠ କରାଯାଇ ଯୋଦ୍ଧା ମାନଙ୍କୁ ସମ୍ମାନ ପ୍ରଦର୍ଶନ କରାଯାଇଛି।
ଏସପି ଡା. କନ୍ୱୱର ବିଶାଳ ସିଂହଙ୍କ ସମେତ ଜିଲାର ସମସ୍ତ ପୁଲିସ ଅଧିକାରୀ ଓ କର୍ମଚାରୀ ଏହି କାର୍ଯ୍ୟକ୍ରମରେ ସାମିଲ ହୋଇଥିଲେ। ଏହା ସହିତ ଅନେକ ବ୍ୟକ୍ତି ନିଜ ଘରେ ମଧ୍ୟ ଶପଥ ପାଠ କରିବା ସହିତ ନିଜ ପରିବାର ଓ ସୁରକ୍ଷା ପାଇଁ କୋଭିଡ ନିୟମକୁ କଡାକଡି ପାଳନ କରିବା ପାଇଁ ମଧ୍ୟ ଶପଥ ନେଇଥିଲେ। ସେହିଭଳି କରୋନା ଯୋଦ୍ଧା ମାନଙ୍କୁ ମଧ୍ୟ ସହଯୋଗ କରିବା ପାଇଁ ମଧ୍ୟ ବହୁ ବ୍ୟକ୍ତି ମତବ୍ୟକ୍ତ କରୁଥିବାର ଦେଖାଯାଇଥିଲା।
