ନୂଆଦିଲ୍ଲୀ : ରାଜ୍ୟଗୋଷ୍ଠୀ କ୍ରୀଡ଼ା ନିମନ୍ତେ ଘୋଷିତ ଭାରତୀୟ ଟେବୁଲ ଟେନିସ୍ ଦଳରୁ ବାଦ୍ ପଡ଼ିଛନ୍ତି ସୌମ୍ୟଜିତ୍ ଘୋଷ। ସୌମ୍ୟଜିତ୍ଙ୍କ ବିରୋଧରେ ଜଣେ ୧୮ ବର୍ଷୀୟା ମହିଳା ବଳାତ୍କାର ଅଭିଯୋଗ ଆଣିବା ପରେ ତାଙ୍କୁ ଭାରତୀୟ ଟେବୁଲ ଟେନିସ୍ ମହାସଂଘ ବାସନ୍ଦ କରିଥିବାରୁ ରାଜ୍ୟଗୋଷ୍ଠୀ କ୍ରୀଡ଼ାରେ ସୌମ୍ୟଜିତ୍ ଭାଗ ନେଇ ପାରିବେ ନାହିଁ ବୋଲି ଜଣାପଡ଼ିଛି।
ଏ ସଂପର୍କରେ ଭାରତୀୟ ଟେବୁଲ ଟେନିସ୍ ମହାସଂଘ ତରଫରୁ ଜାରି ଏକ ବିଜ୍ଞପ୍ତିରେ ଦର୍ଶାଯାଇଛି ମହାସଂଘର କାର୍ଯ୍ୟକାରିଣୀ ସଦସ୍ୟଙ୍କ ବୈଠକ ଅନୁଷ୍ଠିତ ହୋଇ ସୌମ୍ୟଜିତ୍ଙ୍କୁ ବାସନ୍ଦ କରାଯିବା ସପକ୍ଷରେ ମତ ପ୍ରକାଶ ପାଇଥିଲା। ପୁଲିସ ତଦନ୍ତ ସରିବା ଏବଂ କୋର୍ଟ ରାୟ ପ୍ରକାଶ ପାଇଲା ପର୍ଯ୍ୟନ୍ତ ସୌମ୍ୟଜିତ୍ଙ୍କୁ ବାସନ୍ଦ କରାଯାଇଛି। ତେଣୁ ସେ ଜାତୀୟ କିମ୍ବା ଅନ୍ତର୍ଜାତୀୟ ପ୍ରତିଯୋଗିତାରେ ଭାଗ ନେଇପାରିବେ ନାହିଁ।
ସୂଚନାଥାଉକି ସୌମ୍ୟଜିତଙ୍କ ବିରୋଧରେ ଜଣେ ମହିଳା ବଳାତ୍କାର ଅଭିଯୋଗ ଆଣି ପଶ୍ଚିମବଙ୍ଗର ୨୪ ପ୍ରଗଣା ଜିଲାରେ ବରସାତ୍ ଥାନାରେ ଏକ ମାମଲା ରୁଜୁ କରିଥିଲେ। ପୁଲିସ ଘଟଣାର ତଦନ୍ତ ଜାରି ରଖିଛି। ଅନ୍ୟପକ୍ଷରେ ସଂପୃକ୍ତ ମହିଳା ଜଣକ ତାଙ୍କ ଠାରୁ ବହୁବାର ଟଙ୍କା ନେଇଛନ୍ତି ଏବଂ ଅଧିକ ଅର୍ଥ ହାସଲ ପାଇଁ ଏପରି ମିଥ୍ୟା ଅଭିଯୋଗ କରିଥିବା ସୌମ୍ୟଜିତ ନିଜ ପ୍ରତିକ୍ରିୟାରେ କହିଥିଲେ। ସୌମ୍ୟଜିତ୍ଙ୍କୁ ବାସନ୍ଦ କରାଯିବା ସହ ତାଙ୍କୁ ଖୁବ୍ଶୀଘ୍ର କାରଣ ଦର୍ଶାଅ ନୋଟିସ୍ ଜାରି କରାଯିବ ବୋଲି ଭାରତୀୟ ଟେବୁଲ ଟେନିସ୍ ମହାସଂଘ ତରଫରୁ ସୂଚନା ଦିଆଯାଇଛି।
ଆସନ୍ତା ଏପ୍ରିଲ୍ ୪ରୁ ୧୫ ପର୍ଯ୍ୟନ୍ତ ଅଷ୍ଟ୍ରେଲିଆର ଗୋଲ୍ଡକୋଷ୍ଟରେ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜିତ ହେବାକୁ ଯାଉଥିବା ବେଳେ ୨୪ ବର୍ଷୀୟ ସୌମ୍ୟଜିତ୍ ଏଥିପାଇଁ ଜର୍ମାନୀରେ ପ୍ରଶିକ୍ଷଣ ନେଉଥିଲେ। ତେବେ ଭାରତୀୟ ଟେବୁଲ ଟେନିସ୍ ମହାସଂଘର ନିଷ୍ପତ୍ତି ପରେ ସେ ରାଜ୍ୟଗୋଷ୍ଠୀ କ୍ରୀଡ଼ାରେ ଭାଗ ନେଇପାରିବେ ନାହିଁ ବୋଲି ସ୍ପଷ୍ଟ ହୋଇଯାଇଛି।
