ହରାରେ : ଆନ୍ତର୍ଜାତିକ କ୍ରିକେଟ୍ରେ ତା’ର ଉତ୍ଥାନ ଜାରିରଖିଛି ଆଫ୍ଗାନିସ୍ତାନ। ରବିବାର ସମାପ୍ତ ହୋଇଥିବା ଆଇସିସି କ୍ରିକେଟ ବିଶ୍ୱକପ୍ର ଯୋଗ୍ୟତା ପର୍ଯ୍ୟାୟ ଟୁର୍ଣ୍ଣାମେଣ୍ଟରେ ଆଫ୍ଗାନିସ୍ତାନ ଚମ୍ପିଆନ୍ ହୋଇଛି। ବୋଲରଙ୍କ ଚମତ୍କାର ପ୍ରଦର୍ଶନ ବଳରେ ୱେଷ୍ଟଇଣ୍ଡିଜ୍କୁ ସହଜରେ ୭ ୱିକେଟରେ ଆଫ୍ଗାନିସ୍ତାନ ପରାସ୍ତ କରିଛି। ମୁଜିବ୍ ଉର୍ ରେହ୍ମାନ ୪ଟି ୱିକେଟ ନେବାରୁ ପ୍ରଥମେ ବ୍ୟାଟିଂକରି ୱେଷ୍ଟଇଣ୍ଡିଜ୍ ୪୬.୫ ଓଭରରେ ୨୦୪ ରନ୍କରି ଅଲ୍ଆଉଟ ହୋଇଥିଲା। ପରେ ମହମ୍ମଦ ସେହ୍ଜାଦ ଓ ରହମତ୍ ଶାହାଙ୍କ ଅର୍ଦ୍ଧଶତକ ବଳରେ ୪୦.୪ ଓଭରରେ ୩ ୱିକେଟ ହରାଇ ଆଫ୍୍ଗାନିସ୍ତାନ ଜିତିଥିଲା।
ଏହି ଫାଇନାଲ ଖେଳିବାକୁ ଯୋଗ୍ୟତା ଅର୍ଜନ କରିଥିବା ଉଭୟ ୱେଷ୍ଟଇଣ୍ଡିଜ୍ ଓ ଆଫ୍ଗାନିସ୍ତାନ ବିଶ୍ୱକପ୍ ଖେଳିବାର ଯୋଗ୍ୟତା ଅର୍ଜନ କରି ସାରିଥିଲେ। ଫାଇନାଲରେ ୱେଷ୍ଟଇଣ୍ଡିଜ୍ ଟସ୍ ଜିତି ବ୍ୟାଟିଂ ନେଇଥିଲା। ୱେଷ୍ଟଇଣ୍ଡିଜ୍ ନିୟମିତ ବ୍ୟବଧାନରେ ୱିକେଟ ହରାଇଥିଲା। ରୋଭ୍ମ୍ୟାନ ପୱେଲ ୨ଟି ଛକା ସହ ସର୍ବାଧିକ ୪୪ ରନ୍ କରିଥିଲେ। ମାର୍ଲନ ସାମୁଏଲ୍ସ ୩୮, ଏଭିନ୍ ଲୁଇସ୍ ୨୭, ସାଇ ହୋପ୍ ୨୩ ଓ ଆସ୍ଲେ ନର୍ସ ଅପରାଜିତ ୨୬ ରନ୍ କରିଥିଲେ। ମୁଜିବ୍ ଉର୍ ରେହ୍ମାନ ୪ଟି ଓ ଗୁଲ୍ବାଦିନ ନାଇବ୍ ୨ଟି ୱିକେଟ ପାଇଥିଲେ। ୨୦୫ ରନ୍ ବିଜୟଲକ୍ଷ୍ୟ ନେଇ ବ୍ୟାଟିଂ କରିଥିବା ଆଫ୍ଗାନିସ୍ତାନ ସହଳ ଗୁଲ୍ବାଦିନ ନାଇବ୍ (୧୪)ଙ୍କ ୱିକେଟ ହରାଇଥିଲା। ପରେ ଓପ୍ନର ମହମ୍ମଦ ସେହ୍ଜାଦ୍ ଓ ରହମତ୍ ଶାହା ୨ୟ ୱିକେଟ ପାଇଁ ୯୦ ରନ୍ ଯୋଡ଼ି ଦଳର ବିଜୟ ନିଶ୍ଚିତ କରିଥିଲେ। ସେହ୍ଜାଦ ୯୩ ବଲ୍ରୁ ୨ଟି ଛକା ଓ ୧୧ଟି ଚୌକା ସହ ୮୪ ଏବଂ ରହମତ୍ ଶାହା ୭୮ ବଲ୍ରୁ ୪ଟି ଚୌକା ସହ ୫୧ ରନ୍ କରିଥିଲେ। ସମିଉଲ୍ଲା ସେନ୍ୱାରି ୨୦ ଓ ମହମ୍ମଦ ନବି କ୍ରମାଗତ ୩ଟି ଛକା ସହ ୨୭ ରନ୍କରି ଅପରାଜିତ ଥିଲେ। କ୍ରିସ୍ ଗେଲ୍ ୨ଟି ୱିକେଟ ପାଇଥିଲେ।
ଇଣ୍ଡିଜ୍କୁ ହରାଇ ଆଫ୍ଗାନିସ୍ତାନ ଚମ୍ପିଆନ
Popular Categories
Previous article
Next article