ମହାକାଶରେ ପରମାଣୁ ଅସ୍ତ୍ର ନିୟୋଜନ କରୁଛି କି ଋଷ? ଆମେରିକାର ଅଭିଯୋଗ ପରେ ଜବାବ ଦେଲେ ପୁଟିନ୍
ସମାଜ ଡିଜିଟାଲ ଡେସ୍କ: ଋଷ-ୟୁକ୍ରେନ ଯୁଦ୍ଧ ମଧ୍ୟରେ ଏକ ଆଶ୍ଚର୍ଯ୍ୟଜନକ ରିପୋର୍ଟ ସାମ୍ନାକୁ ଆସିଛି। ଆମେରିକା ଅଭିଯୋଗ କରିଛି ଯେ ଋଷ ଏକ ପରମାଣୁ ଅସ୍ତ୍ର ତିଆରି କରୁଛି ଯାହା ମହାକାଶରେ ନିୟୋଜିତ ହୋଇପାରିବ। ଏହାର ଜବାବ ଦେବାକୁ ଯାଇ ମଙ୍ଗଳବାର ଋଷ ରାଷ୍ଟ୍ରପତି ଭ୍ଲାଦିମିର୍ ପୁଟିନ କହିଛନ୍ତି ତାଙ୍କ ଦେଶ ମହାକାଶରେ ପରମାଣୁ ଅସ୍ତ୍ର ନିୟୋଜନ ବିରୁଦ୍ଧରେ ରହିଛି। ଏହାସହ ଆମେରିକାର ଅଭିଯୋଗକୁ ଖଣ୍ଡନ କରିଛନ୍ତି ପୁଟିନ୍। ମହାକାଶରେ ଋଷର କାର୍ଯ୍ୟକଳାପ ଆମେରିକା ଓ ଅନ୍ୟ ଦେଶ ଭଳି ସମାନ ରହିଛି। ପୁଟିନ କହିଛନ୍ତି ଯେ ଋଷ କେବଳ ଏହି କ୍ଷେତ୍ରରେ ଥିବା ସମସ୍ତ ଚୁକ୍ତିନାମାକୁ ପାଳନ କରିବାକୁ ଅନୁରୋଧ କରିବା ସହ ମିଳିତ କାର୍ଯ୍ୟକୁ ମଜବୁତ କରିବାକୁ ପ୍ରସ୍ତାବ ଦେଇଛି।
ମିଳିଥିବା ସୂଚନା ଅନୁଯାୟୀ ଆମେରିକା ବିଶ୍ୱାସର ସହ କହିଛି ଯେ ଋଷ ମହାକାଶ ପାଇଁ ପରମାଣୁ ଅସ୍ତ୍ର ତିଆରି କରୁଛି। ଯାହା ଉପଗ୍ରହ ବିରୋଧୀ। ଏହି ଅସ୍ତ୍ର ବିସ୍ଫୋରଣ ହେଲେ ସାମରିକ ଯୋଗାଯୋଗ ଠାରୁ ଆରମ୍ଭ କରି ମୋବାଇଲ ସେବା ଏବଂ ଅନ୍ୟାନ୍ୟ ସୁବିଧା ପର୍ଯ୍ୟନ୍ତ ସବୁକିଛି ବ୍ୟାହତ ହେବ। ଆମେରିକା ପକ୍ଷରୁ କୁହାଯାଇଛି ଯେ ଟେକ୍ନୋଲୋଜିର ବିକାଶ ବାହ୍ୟ ମହାକାଶ ଚୁକ୍ତିର ଉଲ୍ଲଂଘନ ଅଟେ। ୧୯୭୬ରେ ବାହ୍ୟ ମକାକାଶ ଚୁକ୍ତି ସ୍ୱାକ୍ଷରିତ ହୋଇଥିଲା ଯେଉଁଥିରେ ଋଷ ଏବଂ ଆମେରିକା ମଧ୍ୟ ଅଂଶଗ୍ରହଣ କରିଥିଲେ। ଏହି ଚୁକ୍ତିନାମା ଅନୁଯାୟୀ ପରମାଣୁ ଅସ୍ତ୍ର କିମ୍ବା ଅନ୍ୟ କୌଣସି ପ୍ରକାରର ଅସ୍ତ୍ରଶସ୍ତ୍ର ପୃଥିବୀର କକ୍ଷପଥରେ ସ୍ଥାନିତ ହୋଇପାରିବ ନାହିଁ।
Comments are closed.