ନୂଆଦିଲ୍ଲୀ : ବିଶ୍ବର ଧନୀ ତାଲିକାରେ ସାମିଲ ଅରବପତିଙ୍କ ସମ୍ପତ୍ତିରେ ଅଚାନକ ହ୍ରାସ ଦେଖିବାକୁ ମିଳିଛି । ଏଲନ ମସ୍କଙ୍କଠୁ ଆରମ୍ଭ କରି ବିଲ୍ ଗେଟ୍ସଙ୍କ ପର୍ଯ୍ୟନ୍ତ ଏବଂ ମୁକେଶ ଅମ୍ବାନୀଙ୍କଠୁ ନେଇ ଗୌତମ ଆଦାନୀଙ୍କ ସମ୍ପତ୍ତି କମିଛି । ସବୁଠାରୁ ଅଧିକ କ୍ଷତି ଜେଫ୍ ବେଜୋସଙ୍କୁ ସହିବାକୁ ପଡିଛି । ତାଙ୍କ ସମ୍ପତ୍ତି ୧.୨୭ ଲକ୍ଷ କୋଟି ଟଙ୍କା ହ୍ରାସ ପାଇଛି ।
ବ୍ଲୁମବର୍ଗ ବିଲେନିୟର୍ସ ଇଣ୍ଡେକ୍ସ ଅନୁସାରେ ସମ୍ପତ୍ତି ହ୍ରାସ କେବଳ ଟପ୍ ୧୦ ଧନୀଙ୍କ ପର୍ଯ୍ୟନ୍ତ ସୀମିତ ନାହିଁ, ବରଂ ବିଶ୍ବର ୨୦ ସବୁଠାରୁ ଧନୀଙ୍କ ସମ୍ପତ୍ତି ମଧ୍ୟ କମିଥିବା ଦେଖିବାକୁ ମିଳିଛି । ଟେସଲା ଏବଂ ସ୍ପେଶଏକ୍ସ ଭଳି କମ୍ପାନୀର ମାଲିକ ଏଲନ ମସ୍କଙ୍କ ସମ୍ପତ୍ତି ମଧ୍ୟ ୬.୫୭ ଅରବ ଡଲାର ହ୍ରାସ ପାଇ ୨୩୫ ଅରବ ଡଲାରକୁ ଆସିଯାଇଛି । ସେହିଭଳି ଆମାଜନ ମାଲିକ ଜେଫ୍ ବେଜୋସଙ୍କ ସମ୍ପତ୍ତି ମଧ୍ୟ ୧୫.୨ ଅରବ ଡଲାର ହ୍ରାସପାଇ ୧୯୧ ଅରବ ଡଲାର ରହିଯାଇଛି । ମାର୍କ ଜୁକରବର୍ଗଙ୍କ ୨.୩୯ ଅରବ ଡଲାର, ବିଲ ଗେଟ୍ସଙ୍କ ୧.୯୫ ଅରବ ଡଲାର କମିଛି । ମୁକେଶ ଅମ୍ବାନୀଙ୍କ ସମ୍ପତ୍ତିରେ ୧.୨୦ ଅରବ ଡଲାର ହ୍ରାସ ଦେଖିବାକୁ ମିଳିଛି । ଏବେ ସେ ୧୧୩ ଅରବ ଡଲାର ସମ୍ପତ୍ତିର ମାଲିକ । ବିଶ୍ବର ୧୨ ନମ୍ବର ଧନୀ ତାଲିକାରେ ଥିବା ଗୌତମ ଆଦାନୀଙ୍କ ସମ୍ପତ୍ତି ୧.୩୪ ଅରବ ଡଲାର ହ୍ରାସ ସହିତ ୧୧୦ ଅରବ ଡଲାରକୁ ଖସିଆସିଛି ।
