ଚାଲୁ ଥିଲା ବେଆଇନ ଚାଉଳ କାରବାର ; ମିଲ ପରିସରରେ ୧୪୪ ଧାରା ଜାରି

ସଇଁତଳା : ଜିଲ୍ଲା ପ୍ରଶାସନକୁ ଅନ୍ଧାରରେ ରଖି ମିଲ୍‍ ମାଲିକ କରୁଥିଲେ ବେଆଇନ କାରବାର । ଏମିତି ଏକ ଘଟଣାର ପର୍ଦ୍ଦାଫାଶ କରିଛନ୍ତି ଟିଟିଲାଗଡ଼ ଉପଜିଲ୍ଲାପାଳ ମନୋଜ ସତ୍ୟବାନ ମହାଜନ। ଏକ ବିଶ୍ୱସ୍ତ ସୂତ୍ରରୁ ଖବର ପାଇ ଆଜି ସଇଁତଳା ବିଭିନା ସ୍ଥିତ ରାଇସ ଚଢ଼ାଉ ମିଲ୍‍ ରେ ଚଢ଼ାଉ କରିଥିଲେ । ଯୋଗାଣ ବିଭାଗକୁ ବିନା ସୂଚନା ଦେଇ ପ୍ରଥମେ ମିଲରେ ଚଢ଼ାଉ କରିଥିଲେ। ମିଲ ଭିତରେ ହଜାର ହଜାର ବସ୍ତା ଧାନ ଓ ଚାଉଳ ଦେଖି ଚକିତ ହୋଇଯାଇଥିଲେ ପରେ ମିଲର ସବୁ ଦସ୍ତାବେଜକୁ ଜବତ କରି ଟିଟିଲାଗଡ଼ ଯୋଗାଣ ବିଭାଗ, ସଇଁତଳା ତହସିଲଦାର ସୁରେନ୍ଦ୍ର ମେହେର,ସଇଁତଳା ଯୋଗାଣ ଅଧିକାରୀ ପ୍ରଭାତ କୁମାର ଦାସ ଓ  ପୁଲିସ  ପ୍ରଶାସନକୁ ଚଢ଼ାଉ କରିବା ପାଇଁ ନିର୍ଦ୍ଦେଶ ଦେଇଥିଲେ।
ସମଗ୍ର ମିଲ ପରିସରକୁ ସିଲ କରିବା ପାଇଁ  ତହସିଲଦାରକୁ ନିର୍ଦ୍ଦେଶ ଦେଇଥିଲେ ଉପଜିଲ୍ଲାପାଳ।  ରାଇସ ମିଲର ଅରୁଆ ଚାଉଳ ଗୋଟିଏ ଗୋଦାମ ଏବଂ ଉଷୁନା ଚାଉଳର ଦୁଇଟି ଗୋଦାମକୁ ସିଲ କରିଥିଲେ। ଅନୁମାନ କରାଯାଉଛି ଅସାଧୁ ଉପାୟରେ ବ୍ୟାପକ ଧାନ ଏବଂ ଚାଉଳ କଳାବଜାରୀ କରିବା ସହ ସରକାରଙ୍କ ରାଜକୋଷକୁ ପରୋକ୍ଷରେ ଲୁଟ କରିଥିଲେ ସମ୍ପୃକ୍ତ ମିଲ ମାଲିକ । ତେବେ ଆସନ୍ତା କାଲି ମିଲରେ କେତେ ପରିମାଣରେ ଧାନ ଓ ଚାଉଳ ଗଚ୍ଛିତ ରହିଛି ତାହା ଓଜନ ପରେ ଜଣାପଡିବ ବୋଲି ଟିଟିଲାଗଡ଼ ଅତିରିକ୍ତ ଯୋଗାଣ ଅଧିକାରୀ ଶଙ୍କର୍ଷଣ ଭୋଇ ପ୍ରକାଶ କରିଛନ୍ତି। ଆଜି ସକାଳୁ ଜିଲ୍ଲାର ଏକ ସ୍ୱତନ୍ତ୍ର  ଟିମ  ରାଇସ ମିଲକୁ ପହଁଚି ତଦନ୍ତ ଆରମ୍ଭ କରିଥିବା ଜଣାପଡ଼ିଛି। ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଟିଟିଲାଗଡ଼ ଉପଜିଲ୍ଲାପାଳ ମନୋଜ ସତ୍ୟବାନ ମହାଜନ ମିଲ ପରିସରରେ ୧୪୪ ଧାରା ଜାରି କରିଛନ୍ତି।