ରେଙ୍ଗାଲିକ୍ୟାମ୍ପ: ଅତାବିରା ଥାନା ଅଧୀନରେ ଅପରାଧ ଘଟାଇବାପରେ ଘଟଣାସ୍ଥଳରୁ ଫେରାର ହୋଇଯାଇଥିଲେ ୨ ଅଭିଯୁକ୍ତ। ସେମାନଙ୍କୁ ଧରିବା ପାଇଁ ଅତାବିରା ପୁଲିସ ପକ୍ଷରୁ ଜାରି କରିଥିଲା ୱାରେଣ୍ଟ, କିନ୍ତୁ ସେମାନଙ୍କର କୌଣସି ଖୋଜଖବର ପୁଲିସ ହାତରେ ଲାଗିନଥିଲା। ଇତି ମଧ୍ୟରେ ଫେରାର ଅଭିଯୁକ୍ତ ଅନ୍ୟତ୍ର ଯାଇ ଜୀବନଯାପନ ଶୈଳୀରେ ସୁଧାର ଆଣିଥିଲେ। ଅନ୍ୟ ଜାଗାରେ ଜଣେ ଅଭିଯୁକ୍ତ ଚା’ ଦୋକାନ ଓ ଅନ୍ୟ ଜଣେ ଜଳଖିଆ ଦୋକାନ ଦେଇ ଜୀବନ ନିର୍ବାହ କରୁଥିଲେ। କୌଣସି ସୂତ୍ରରୁ ଖବର ପାଇ ଅତାବିର ପୁଲିସ ୱାରେଣ୍ଟ ବଳରେ ସେମାନଙ୍କୁ ଗିରଫ କରିବାରେ ସଫଳ ହୋଇଛି।
ପୃଥକ୍ ପୃଥକ୍ ଅପରାଧିକ କାର୍ଯ୍ୟରେ ଲିପ୍ତ ଥିବା ଅଭିଯୋଗରେ ଏହି ୨ଜଣ ଅଭିଯୁକ୍ତଙ୍କ ନାମରେ ୱାରେଣ୍ଟ ଜାରି ହୋଇଥିଲା। କିନ୍ତୁ ପୁଲିସ ଆଖିରେ ଧୁଳିଦେଇ ଏମାନେ ଆରାମରେ ବୁଲୁଥିଲେ। ଆଜି ସେହି ୨ଜଣ ଅଭିଯୁକ୍ତଙ୍କୁ ଅତାବିରା ପୁଲିସ ଗିରଫ ପରେ କୋର୍ଟ ଚାଲାଣ କରିଥିବା ସୂଚନା ମିଳିଛି। ସେମାନେ ହେଲେ ଅତାବିରା ଥାନା ଅନ୍ତର୍ଗତ କୋକେଇତିରାର ଶଙ୍କର ମେହେର (୩୭) ଓ ଅନ୍ୟ ଜଣେ ହେଲେ ପହାଶ୍ରୀଗିଡ଼ା ଦଶାଡ଼ି ବ୍ରିଜର ବଦ୍ରି ସାହୁ(୩୫)। ପୁଲିସର ସୂଚନା ଅନୁଯାୟୀ ଶଙ୍କର ମେହେର ଗତ ୨୦୧୩ ମସିହାରେ ଏକ ନାବାଳିକାକୁ ଦୁର୍ବ୍ୟବହାର କରି ଫେରାର ହୋଇଯାଇଥିଲେ। ଅଭିଯୋଗ ପରେ ତାଙ୍କ ବିରୁଦ୍ଧରେ ପୋକ୍ସୋ ଧାରାରେ କେସ ନଂ ୩୩୩/୧୩ ରେ ଏକ କେସ ରୁଜୁ ହୋଇଥିଲା। ତେବେ ଦୀର୍ଘ ୮ ବର୍ଷ ଧରି ସେ ଲୁଚି ଟିଟିଲାଗଡରେ ଚା’ ଦୋକାନ ଖୋଲି ସେଠାରେ ରହିଆସୁଥିଲା। ବିଶେଷ ସୂତ୍ରରୁ ଖବର ପାଇ ଅତାବିରା ପୁଲିସ ଛଦ୍ମ ବେଶରେ ଯାଇ ତାକୁ ଆଜି ଗିରଫ କରିବା ସହ କୋର୍ଟ ଚାଲାଣ କରିଛି। ଠିକ୍ ସେହିପରି ପାହାରଶ୍ରୀଗିଡାର ବଦ୍ରି ସାହୁ ଗତ ୨୦୧୪ ମସିହାରେ ମାରପିଟ୍ ତଥା ଗଣ୍ଡଗୋଳ କରି ଫେରାର ହୋଇଯାଇଥିଲା। ବଦ୍ରି ବିରୁଦ୍ଧରେ ମଧ୍ୟ କେସ ନଂ ୧୧୨୦/୧୪ରେ ଏକ କେସ ରୁଜୁ ହୋଇ ୱାରେଣ୍ଟି ଜାରି ହୋଇଥିଲା। ଦୀର୍ଘ ସାତ ବର୍ଷ ଧରି ସେ ବଲାଙ୍ଗୀର ଜିଲା ବେଳପଡ଼ା ଠାରେ ଜଳଖିଆ ଦୋକାନ କରି ବିନ୍ଦାସ୍ ରହିଆସୁଥିଲା। ପୁଲିସ ଖୋଜଖବର କରି ଆଜି ତାକୁ କଣ୍ଟାବାଞ୍ଜି ଠାରେ ଗିରଫ କରି କୋର୍ଟ ଚାଲାଣ କରିଛି।
