ରେଙ୍ଗାଲି: ରେଙ୍ଗାଲି ବ୍ଳକ୍ କତରବଗା ସ୍ଥିତ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ପରିସର ତଥା ଏହାର ଚତୁଃପାର୍ଶ୍ବ ଅଞ୍ଚଳରେ ଆଜି ରେଙ୍ଗାଲିର ସ୍ୱାଧିନ ଏକତା ସଙ୍ଗଠନ ଏବଂ ସମ୍ବଲପୁରର ନେହେରୁ ଯୁବକେନ୍ଦ୍ରର ମିଳିତ ଆନୂକୂଲ୍ୟରେ ସ୍ୱଚ୍ଛତା ପକ୍ଷ ପାଳନ ଅବସରରେ ଗଣ ସଫେଇ ଏବଂ ବୃକ୍ଷ ରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମରେ ସ୍ୱାଧିନ ଏକତା ସଙ୍ଗଠନର ସମ୍ପାଦକ ସରୋଜ ବିଶୋଇ, ସେନା ବାହିନୀର ସେବା ନିବୃତ୍ତ ଜବାନ ଅଶୋକ କୁମରା ସାହୁ, ଉତ୍ତମ ବିଶ୍ୱାଲ, ଅଜୟ ସାହୁ, ନିମିତା ମହାନନ୍ଦ ଶାଶ୍ୱତ ପ୍ରମୁଖଙ୍କ ନେତୃତ୍ୱରେ ଗ୍ରାମର ସ୍ୱେଚ୍ଛାସେବୀ ଅଂଶ ଗ୍ରହଣ କରିଥିଲେ।
କତରବଗା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରର ଡାକ୍ତର ଡିନେଶ ମେହେର ଏବଂ ଡା.ଶୁଭଦ୍ରା ଦାଶ ଅତିଥି ରୂପେ ଯୋଗ ସମବେତ ସ୍ୱେଚ୍ଛାସେବୀ ଏବଂ ଜନସାଧାରଣଙ୍କୁ ଉଦ୍ବୋଧନ ଦେଇ ନିଜ ନିଜର ପରିବେଶକୁ କିପରି ସ୍ୱଚ୍ଛ ରଖି ଏକ ସୁସ୍ଥ ଏବଂ ସ୍ୱାସ୍ଥ୍ୟକର ପରିବେଶ ସୃଷ୍ଟି କରାଯାଇ ପାରିବ ସେ ସଂକ୍ରାନ୍ତରେ ଆଲୋକପାତ କରିଥିଲେ। ନେହେରୁ ଯୁବକେନ୍ଦ୍ରର ସ୍ୱେଚ୍ଛାସେବୀ ଦୀପାଞ୍ଜଳି ବେହେରା କାର୍ଯ୍ୟକ୍ରମକୁ ସଂଯୋଜନା କରିଥିଲେ।
