ରେଙ୍ଗାଲି: ରେଙ୍ଗାଲି ବ୍ଳକ ରେଙ୍ଗଲୋଇ ପଞ୍ଚାୟତର ସମିତି ସଭ୍ୟ ପଦ ପାଇଁ ପ୍ରତିଦ୍ବନ୍ଦ୍ବିତା କରୁଥିବା ଅଶ୍ବିନୀ ପଟେଲଙ୍କ ବ୍ୟାନରରେ ପେଟ୍ରୋଲ ଢାଳିଦେଇ ପୋଡି ଦିଆଯାଇଛି। ଏହାସହିତ ଏହି ବ୍ୟାନର୍ ଲାଗିଥିବା ଚାଳରେ ତିଆରି କୁକୁଡା ଘର ପୋଡି ଯାଇଥିବା ଜଣାପଡ଼ିଛି। ଏ ସଂକ୍ରାନ୍ତରେ ଅଭିଯୋଗ ହେବା ପରେ କତରବଗା ଥାନାରେ ଏକ ମାମଲା ରୁଜ୍ଜୁ ହୋଇଛି। ଥାନା ଆଇଆଇସି ପ୍ରତାପ କୁମାର ରଣା, ଲଇଡା ଫାଣ୍ଡିର ଭାରପ୍ରାପ୍ତ ଅଧିକାରୀ ରବୀନ୍ଦ୍ର ପ୍ରଧାନ ଘଟଣା ସ୍ଥଳକୁ ଯାଇ ସରଜମିନ ତଦନ୍ତ ଆରମ୍ଭ କରିଛନ୍ତି।
ପୁଲିସ ସୂତ୍ରରୁ ପ୍ରାପ୍ତ ସୂଚନା ଅନୁଯାୟୀ ରେଙ୍ଗଲୋଇ ପଞ୍ଚାୟତର ମରାପତ୍ରା ଗ୍ରାମର ଭିକମୁଣ୍ଡାଙ୍କ କୁକୁଡା ଦୋକାନରେ ସମିତି ସଭ୍ୟ ପ୍ରାର୍ଥୀ ଅଶ୍ବିନୀ ପଟେଲଙ୍କ ବ୍ୟାନର୍ ଲଗାଯାଇଥିଲା। ସୋମବାର ରାତିରେ ଗଣ୍ଡାକୋନା ଗ୍ରାମର ସୁଶାନ୍ତ ରହନା ସହିତ ଆଉ ଦୁଇ ଜଣ ଯୁବକ ଭିକ ମୁଣ୍ଡା ଘରକୁ ଆସି ତାକୁ ଅସଭ୍ୟ ଭାଷାରେ ଗାଳି ଗୁଲଜ କରି ଅଶ୍ବିନୀ ପଟେଲକୁ ଭୋଟ ଦେଲେ ଜୀବନ ରେ ମାରିଦେବୁ ବୋଲି ଧମକ ଦେଇ ବ୍ୟାନରରେ ପେଟ୍ରୋଲ ଢାଲି ନିଆଁ ଲଗାଇ ଦେଇଥିଲେ।
ଫଳରେ ବ୍ୟାନର ଓ ଭିକ ମୁଣ୍ଡାର ଚାଳରେ ତିଆରି କୁକୁଡା ଘର ପୋଡି ଯାଇଛି ବୋଲି ଥାନାରେ ଭିକ ମୁଣ୍ଡା ଲିଖିତ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ କତରବଗା ଥାନାରେ ଦଫା ୪୩୬,୨୯୪,୫୦୬,୧୭୧(ସି)/୩୪ଆଇପିସିରେ ମାମଲା ରୁଜ୍ଜୁ କରାଯାଇ ତଦନ୍ତ ଜାରି ରହିଛି ବୋଲି କତରବଗା ଆଇଆଇସି ପ୍ରତାପ କୁମାର ରଣା କହିଛନ୍ତି।
