ରେଙ୍ଗାଲି : ଅଦିନିଆ ବର୍ଷା ଚାଷୀ ମାନଙ୍କ ପାଇଁ କାଳ ସାଜିଛି। ନିୟମିତ ବ୍ୟବଧାନ ରେ ପ୍ରବଳ ବର୍ଷା ଯୋଗୁଁ ଚାଷୀ ନାହିଁ ନଥିବା କ୍ଷତିର ସମ୍ମୁଖୀନ ହୋଇଥିବାର ଦେଖିବାକୁ ମିଳୁଛି। ଅନେକ କ୍ଷୁଦ୍ର ଏବଂ ନାମମାତ୍ର ଚାଷୀ ଅଦିନିଆ ବର୍ଷା ଯୋଗୁଁ ସର୍ବସ୍ୱାନ୍ତ ହେବା ଭଳି ଅବସ୍ଥାକୁ ପହଞ୍ଚି ଯାଇଥିବାର ଜଣାପଡିଛି। ରେଙ୍ଗାଲି ବ୍ଳକର କତରବଗା ଗ୍ରାମର ସୁଜିତ କୁମାର ରାଉତ ଜଣେ କ୍ଷଦ୍ର ଚାଷୀ। ସାଢେ ତିନି ଏକର ଜମିରେ ଧାନ ଚାଷ କରିଛନ୍ତି। ଚାଷ କାର୍ଯ୍ୟ ସମ୍ପାଦନ ପାଇଁ ସେବା-ସମବାୟ ସମିତିରୁ ୭୦ ହଜାର ଟଙ୍କା କୃଷି ଋଣ ଆଣିଛନ୍ତି। ରୋଗ ପୋକ ଦାଉରୁ ଧାନ ଫସଲକୁ ରକ୍ଷା କରି ଭଲ ଫସଲ ଆଦାୟ ହେବ ବୋଲି ସୁଜିତ ଖୁସି ହେଉଥିଲେ। କିନ୍ତୁ ଅଦିନିଆ ବର୍ଷା ବଇରୀ ସାଜି ସବୁ ସତ୍ୟାନାଶ କରିଦେଲା। ବର୍ଷା ଯୋଗୁଁ ମୋର ଭାତ ହାଣ୍ଡି ଉଜୁଡିଗଲା ବୋଲି ସୁଜିତ କ୍ଷୋଭ ପ୍ରକାଶ କରିଛନ୍ତି। ବର୍ଷା ଏବଂ ପବନ ରେ ଧାନ ଗଛ ମାଟିରେ ଲୋଟି ଯାଇ ଧାନ କେଣ୍ଡା ପାଣିରେ ଭିଜୁଛି। ମୋର ସବୁ ଆଶା ଅଦିନିଆ ବର୍ଷା ରେ ଚୌପଟ ହୋଇଗଲା। କୃଷି ଋଣ କିପରି ପରିଶୋଧ କରିବି ଏହି ଭାବନା ରେ ମୋ ଆଖିରୁ ନିଦ ହଜିଯାଇଛି ବୋଲି କହନ୍ତି ସୁଜିତ।
ସୁଜିତ ରାଉତଙ୍କ ଭଳି ରେଙ୍ଗାଲି ବ୍ଳକ୍ ର ଅଧିକାଂଶ ଗ୍ରାମରେ ଅଦିନିଆ ବର୍ଷା ଏବଂ ପବନରେ ରେ ବହୁ ସଂଖ୍ୟକ ଚାଷୀ ନାହିଁ ନଥିବା କ୍ଷତି ର ସମ୍ମୁଖୀନ ହୋଇ କୃଷିଋଣ ପରିଶୋଧ ଏବଂ ପରିବାର ପ୍ରତିପୋଷଣ ନେଇ ଭାଳେଣି କରି ଚିନ୍ତାଗ୍ରସ୍ତ ହୋଇପଡିଛନ୍ତି। ଚାଷୀ ମାନଙ୍କ ଅଦିନିଆ ବର୍ଷା ଶନିଦଶା ଭଲି ମାଡି ବସିଥିବା ବେଳେ ସରକାର ଏପର୍ଯ୍ୟନ୍ତ ବର୍ଷା ଜନିତ କ୍ଷତିର କ୍ଷତିପୂରଣ ବାବଦରେ ଚୁପ୍ ଥିବାରୁ ଚାଷୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଉଛି। ବ୍ୟୟ ବହୁଳ ଏବଂ କଷ୍ଟସାଧ୍ୟ ଚାଷ ଅଦିନିଆ ବର୍ଷା ରେ ନଷ୍ଟ ହୋଇ ଚାଷୀ କ୍ଷତିର ସମ୍ମୁଖିନ ହୋଇଥିବାରୁ କ୍ଷତିଗ୍ରସ୍ତ ଚାଷୀ ମାନଙ୍କୁ ଉପଯୁକ୍ତ କ୍ଷତି ପୂରଣ ଦେବାକୁ ଦାବୀ ହେଉଛି।
