ଇସଲାମାବାଦ : ସାଧାରଣ ନିର୍ବାଚନ ପରେ ଭାରତ ସହିତ ସୁସ୍ଥ ସମ୍ପର୍କ ସ୍ଥାପନ ନେଇ ଆଶା ବ୍ୟକ୍ତ କରିଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ। ଶନିବାର ଇମ୍ରାନ କହିଛନ୍ତି ଯେ ‘ଆମେ ଏକ ଶାନ୍ତିପୂର୍ଣ୍ଣ ଅଞ୍ଚଳ ପ୍ରତିଷ୍ଠା କରିବାକୁ ପ୍ରୟାସ ଜାରି ରଖିଛୁ। ଇରାନ ସହିତ ଆମର ସୁସମ୍ପର୍କ ରହିଛି ଓ ଏହାକୁ ଆମେ ଅଧିକ ସୁଦୃଢ଼ କରିବାକୁ ଯାଉଛୁ। ଆଫଗାନିସ୍ତାନରେ ଯାହା କିଛି ଘଟୁଛି ତାହାର ପ୍ରଭାବ ପାକିସ୍ତାନ ଉପରେ ପଡ଼ୁଛି; କେବଳ ଭାରତ ସହିତ ସମ୍ପର୍କରେ ସମସ୍ୟା ରହିଛି; ଏହା ଆଞ୍ଚଳିକ ଶାନ୍ତି ପ୍ରତିଷ୍ଠାରେ ବ୍ୟାଘାତ ସୃଷ୍ଟିକରୁଛି। ସମ୍ପ୍ରତି ସେଠାରେ ଚାଲିଥିବା ସାଧାରଣ ନିର୍ବାଚନ ପରେ ସମ୍ପର୍କରେ ସୁଧାର ଆସିବ।’ ପୂର୍ବରୁ ନିର୍ବାଚନ ପରେ ଭାରତ ସହିତ ଶାନ୍ତି ଆଲୋଚନା ପାଇଁ ବାଟ ଫିଟିବ ବୋଲି ଆଶା ପ୍ରକଟ କରିଥିବା ଇମ୍ରାନଙ୍କ ପୁନର୍ବାର ଏଭଳି ମନ୍ତବ୍ୟ ନେଇ ଚର୍ଚ୍ଚା ଆରମ୍ଭ ହୋଇଛି। ପ୍ରାୟ ଦୁଇ ସପ୍ତାହ ପୂର୍ବେ ଇମ୍ରାନ କହିଥିଲେ ଯେ ‘ଭାରତରେ ଚାଲିଥିବା ନିର୍ବାଚନ ପରେ ଏହି ଦେଶ ସହିତ ଶାନ୍ତି ଆଲୋଚନାର ଯଥେଷ୍ଟ ସୁଯୋଗ ରହିଛି। ବିଜେପି କ୍ଷମତାକୁ ଫେରିଲେ କାଶ୍ମୀର ପ୍ରସଙ୍ଗରେ କିଛି ଗୋଟେ ସମାଧାନ ହେବ।’ ଇମ୍ରାନଙ୍କ ଏଭଳି ମନ୍ତବ୍ୟ ନେଇ ଭାରତରେ ରାଜନୈତିକ ଝଡ଼ ସୃଷ୍ଟି ହୋଇଥିଲା।
Comments are closed.